ന്യൂയോര്‍ക്ക്: ലോകത്ത് കൊവിഡ് മഹാമാരി ബാധിച്ച് മരിച്ചവരുടെ എണ്ണം 50 ലക്ഷം കടന്നു. കൂടുതലും വാക്‌സിനെടുക്കാത്തവരാണെന്നാണ് റിപ്പോര്‍ട്ട്. ലോകജനസംഖ്യയില്‍ പകുതിയിലേറെയും ഒരു ഡോസ് വാക്‌സിന്‍ പോലുമെടുക്കാത്തവരാണെന്ന് അവര്‍വേള്‍ഡ്ഇന്‍ഡാറ്റയുടെ കണക്കുകള്‍ പറയുന്നു.

ഒരുവര്‍ഷം കൊണ്ടാണ് ലോകത്ത് 25 ലക്ഷം കൊവിഡ് മരണമുണ്ടായത്. എന്നാല്‍ ശേഷിക്കുന്ന 25 ലക്ഷം പേര്‍ മരിച്ചത് 236 ദിവസം കൊണ്ടാണെന്നും വാര്‍ത്താ ഏജന്‍സിയായ റോയിട്ടേഴ്‌സ് പറയുന്നു. ലോകത്തെ കൊവിഡ് മരണങ്ങളില്‍ പകുതിയും യു.എസ്, റഷ്യ, ബ്രസീല്‍, മെക്‌സിക്കോ, ഇന്ത്യ എന്നീ രാജ്യങ്ങളിലാണുണ്ടായത്. യു.എസില്‍ ഏഴുലക്ഷത്തിലേറെ പേര്‍ മരിച്ചതായി ജോണ്‍സ് ഹോകിന്‍സ് യൂനിവേഴ്‌സിറ്റിയുടെ റിപ്പോര്‍ട്ടില്‍ പറയുന്നു. 

മിനുട്ടില്‍ അഞ്ചുപേരാണ് ലോകത്ത് കൊവിഡ് മൂലം മരിക്കുന്നത്. ആഴ്ചയില്‍ മരിക്കുന്നവരുടെ എണ്ണം 8,000. 55.7 ശതമാനം പേര്‍ വാക്‌സിനെടുത്ത യു.എസില്‍ പ്രതിദിനം മരിക്കുന്നത് 1,000 പേരാണെന്നും റിപ്പോര്‍ട്ടിലുണ്ട്.