ന്യൂഡല്‍ഹി: പാര്‍ലമെന്റ് ആക്രമണത്തില്‍ അറസ്റ്റിലായ നാല് പ്രതികളെയും ഡല്‍ഹി പട്യാല കോടതി ഏഴുദിവസത്തെ പൊലിസ് കസ്റ്റഡിയില്‍ വിട്ടു. പ്രതികളായ മനോരഞജന്‍.ഡി, സാഗര്‍ ശര്‍മ, അമോല്‍ ഷിന്‍ഡെ, നീലം എന്നിവരെ ഡല്‍ഹി പോലീസ് സ്‌പെഷ്യല്‍ സെല്ലിന്റെ കസ്റ്റഡിയിലാണ് വിട്ടത്.

പ്രത്യേക ജഡ്ജി ഹര്‍ദ്വീപ് കൗറിനുനുമുന്നിലാണ് പ്രതികളെ പൊലീസ് ഹാജരാക്കിയത്. നാലുപ്രതികളും ചെയ്തത് തീവ്രവാദ പ്രവര്‍ത്തനവും ഭയപ്പെടുത്തലുമായിരുന്നുവെന്നും അക്രമണം ആസൂത്രിതമായിരുന്നുവെന്നും പ്രോസിക്യൂഷന്‍ വാദിച്ചു. 15 ദിവസത്തെ കസ്റ്റഡി അപേക്ഷയായിരുന്നു പൊലീസ് നല്‍കിയത്. എന്നാല്‍ ഇതിനെ പ്രതിഭാഗം എതിര്‍ത്തു. കസ്റ്റഡിയില്‍ ചോദ്യം ചെയ്യാന്‍ രണ്ടോ മൂന്നോ ദിവസം മതിയെന്നായിരുന്നു പ്രതിഭാഗത്തിന്റെ വാദം. പ്രതികള്‍ക്കുവേണ്ടി അഭിഭാഷകര്‍ ഹാജരാവാത്തതിനാല്‍ ഇവരുടെ നിയമ സഹായത്തിനായി അഭിഭാഷകനെ കോടതി നിയമിക്കുകയായിരുന്നു.

പ്രതികള്‍ക്കെതിരെ തീവ്രവാദ വിരുദ്ധനിയമമായ യു.എ.പി.എ. പ്രകാരമുള്ള കുറ്റങ്ങളടക്കം ഡല്‍ഹി പൊലീസിന്റെ പ്രത്യേക സെല്‍ നേരത്തെ ചുമത്തിയിരുന്നു. നിയമവിരുദ്ധ പ്രവര്‍ത്തന നിരോധന നിയമത്തിലെ വകുപ്പുകള്‍ പ്രകാരവും ഇന്ത്യന്‍ ശിക്ഷാ നിയമത്തിലെ 120 ബി, 452, 153, 186, 353 കുപ്പുകള്‍ പ്രകാരവുമാണ് കേസ്.

പാര്‍ലമെന്റ് ആക്രമണം; നാല് പ്രതികളും ഏഴ് ദിവസത്തെ പൊലീസ് കസ്റ്റഡിയില്‍