തിരുവനന്തപുരം: പുരാവസ്തു തട്ടിപ്പിന് കൂട്ടുനിന്നവര്‍ ആരായാലും നടപടിയെടുക്കുമെന്ന് മുഖ്യമന്ത്രി പിണറായി വിജയന്‍ നിയമസഭയെ അറിയിച്ചു. പ്രത്യേക സംഘം അന്വേഷണം നടത്തുന്നുണ്ട്. അന്വേഷണ സംഘത്തിനെതിരേ ഇതുവരെ ആരും ആക്ഷേപം ഉന്നയിച്ചിട്ടില്ലെന്നും അദ്ദേഹം പറഞ്ഞു.

പ്രമുഖ രാഷ്ട്രീയ നേതാവ് പണം കൈമാറുന്ന വേളയില്‍ അവിടെ ഉണ്ടായിരുന്നു എന്ന പരാതി ലഭിച്ചാല്‍ ഗൗരവതരമായി പരിശോധിക്കും. ഐ.ടി വിദഗ്ധര്‍ പങ്കെടുക്കുന്ന കൊക്കൂണ്‍ സമ്മേളനത്തില്‍ മോന്‍സണ്‍ പങ്കെടുത്തതായി രജിസ്റ്ററില്‍ രേഖപ്പെടുത്തിയിട്ടില്ല. മോന്‍സന്റെ പക്കല്‍നിന്ന് കണ്ടെടുത്ത ശബരിമലയുമായി ബന്ധപ്പെട്ട ചെമ്പോല യഥാര്‍ത്ഥമാണെന്ന് സര്‍ക്കാര്‍ ഒരു ഘട്ടത്തിലും പറഞ്ഞിട്ടില്ല. ചെമ്പോല വ്യാജമാണെന്ന് അന്വേഷണത്തില്‍ തെളിഞ്ഞിട്ടുണ്ട്. ഇക്കാര്യത്തില്‍ അന്വേഷണത്തിനു ശേഷം ശക്തമായ നടപടി സ്വീകരിക്കും.

മുന്‍ ഡി.ജി.പി ലോക്‌നാഥ് ബെഹ്‌റ തട്ടിപ്പുകാരനായ മോന്‍സന്റെ വീട്ടില്‍ പോകാനിടയായ സാഹചര്യം വ്യക്തമല്ല. സന്ദര്‍ശന ശേഷം മോന്‍സണെക്കുറിച്ച് അന്വേഷിക്കാന്‍ ഇന്റലിജന്‍സിനോട് അദ്ദേഹം ആവശ്യപ്പെടുകയും ചെയ്തിട്ടുണ്ട്. ഈ റിപ്പോര്‍ട്ട് കിട്ടിയ ശേഷമാണ് ഇ.ഡി അന്വേഷണം അവശ്യപ്പെട്ടത്. വ്യാജ പുരാവസ്തുക്കളുമായി ബന്ധപ്പെട്ട അന്വേഷണം ആര്‍ക്കിയോളജിക്കല്‍ സര്‍വേ ഓഫ് ഇന്ത്യയുടെ ശ്രദ്ധയില്‍പ്പെടുത്തി കേസന്വേഷിക്കാനാണ് ക്രൈംബ്രാഞ്ച് ശ്രമിക്കുന്നത്. വീടിനു നല്‍കിയ സുരക്ഷ സ്വാഭാവികമായ നടപടിയാണെന്ന് പൊലിസ് മേധാവി വ്യക്തമാക്കിയിട്ടുണ്ടെന്നും മുഖ്യമന്ത്രി പറഞ്ഞു.