കോട്ടയം: എം.ജി സര്‍വകലാശാല സെനറ്റ് തെരഞ്ഞെടുപ്പുമായി ബന്ധപ്പെട്ട് പ്രവര്‍ത്തകര്‍ക്കു നേരെ ആക്രമണമുണ്ടായ സംഭവത്തില്‍ പ്രതിഷേധവുമായി എ.ഐ.എസ്.എഫ് ആലപ്പുഴ ജില്ലാ കമ്മിറ്റി. എസ്.എഫ്.ഐയും ആര്‍.എസ്.എസും തമ്മിലെന്താണ് വ്യത്യാസമെന്ന് ജില്ലാ കമ്മിറ്റി പുറത്തിറക്കിയ പ്രസ്താവനയില്‍ ചോദിച്ചു. ആക്രമണത്തില്‍ പ്രതിഷേധിച്ച് ജില്ലയിലെ വിവിധ ഇടങ്ങളില്‍ പ്രതിഷേധം സംഘടിപ്പിച്ചു. സംഭവത്തില്‍ എ.ഐ.എസ്.എഫ് സംസ്ഥാന സെക്രട്ടറിയേറ്റും പ്രതിഷേധം രേഖപ്പെടുത്തി.

ഇന്നലെ നടന്ന എം.ജി സര്‍വകലാശാല സെനറ്റ് തെരഞ്ഞെടുപ്പില്‍ എസ്.എഫ്.ഐക്കെതിരെ മത്സരിക്കാന്‍ ഒരു എ.ഐ.എസ്.എഫ് പ്രവര്‍ത്തകന്‍ തീരുമാനിച്ചതാണ് തുടക്കം. വാക്കു തര്‍ക്കം തുടര്‍ന്ന് സംഘര്‍ഷത്തിലേക്കും കയ്യാങ്കളിയിലേക്കും എത്തി. സംഘര്‍ഷത്തില്‍ എ.ഐ.എസ്.എഫ് സംസ്ഥാന നേതാക്കള്‍ അടക്കം നാല് പേര്‍ക്ക് പരിക്കേറ്റു.

സംഭവത്തില്‍ കണ്ടാലറിയാവുന്ന 11 നേതാക്കള്‍ക്കെതിരെ ഗാന്ധിനഗര്‍ പൊലിസ് കേസ് രജിസ്റ്റര്‍ ചെയ്തിട്ടുണ്ട്.