കടംവീട്ടാന്‍ 80കാരിയുടെ മാല പിടിച്ചുപറിച്ചു, യുവാവ് അറസ്റ്റില്‍

കോട്ടയം: ഓണ്‍ലൈന്‍ റമ്മി കളിച്ച് മൂന്ന് ലക്ഷം രൂപ നഷ്ടപ്പെട്ടതോടെ കടം വീട്ടാന്‍ എണ്‍പതുകാരിയുടെ മാല മോഷ്ടിച്ചയാള്‍ പിടിയില്‍. കോട്ടയം പാലാ ഭരണങ്ങാനം സ്വദേശി അമല്‍ അഗസ്റ്റിനാണ് പിടിയിലായത്.

പത്തനംതിട്ട നെടിയകാലയില്‍ നവംബര്‍ 23നാണ് കേസിനാസ്പദമായ സംഭവം നടന്നത്. പത്തംനംതിട്ട സ്വദേശിയായ 80കാരിയുടെ കഴുത്തില്‍ കത്തിവെച്ച ശേഷം ഭീഷണിപ്പെടുത്തി പ്രതി മാല മോഷ്ടിക്കുകയായിരുന്നു. സിസിടിവി തെളിവുകളുടെയും പ്രതി സഞ്ചരിച്ച സ്‌കൂട്ടര്‍ കേന്ദ്രീകരിച്ചും പൊലിസ് നടത്തിയ അന്വേഷണത്തിനൊടുവിലാണ് അമല്‍ അഗസ്റ്റിനെ പിടികൂടിയത്.

'പ്രതി റമ്മി കളിക്ക് അടിമയായിരുന്നു. മറ്റൊരാള്‍ മോഷ്ടിച്ചതാണെന്ന തോന്നലുണ്ടാക്കി ഇതിനുമുന്‍പ് സ്വന്തം വീട്ടില്‍നിന്നും പ്രതി 35,000 രൂപ മോഷ്ടിച്ചിരുന്നു. ഇതും റമ്മി കളിക്കാണ് ഉപയോഗിച്ചത്. പിന്നെയും പണം പലരും ആവശ്യപ്പെട്ടപ്പോള്‍ പെട്ടെന്ന് പണം കണ്ടെത്താനായി മോഷണം നടത്തുകയായിരുന്നു', പൊലിസ് പറഞ്ഞു.