ന്യൂഡൽഹി
കേരളം ഉൾപ്പെടെ അഞ്ചു സംസ്ഥാനങ്ങളിൽ ബി.ജെ.പി നിയമസഭാ തെരഞ്ഞെടുപ്പ് പ്രചാരണത്തിന് ചെലവഴിച്ചത് 252 കോടി രൂപ. അസം, പുതുച്ചേരി, തമിഴ്നാട്, ബംഗാൾ, കേരളം എന്നിവിടങ്ങളിലാണ് ബി.ജെ.പി പ്രചാരണത്തിന് ഇത്രയും പണമൊഴുക്കിയത്. ഇതിൽ 60 ശതമാനവും ബംഗാളിലാണ് ചെലവഴിച്ചത്. ബംഗാളിൽ തൃണമൂൽ കോൺഗ്രസിൽ നിന്ന് ഭരണം പിടിക്കാൻ 151 കോടി രൂപയാണ് ബി.ജെ.പി പ്രചാരണത്തിന് മുടക്കിയത്. കടുത്ത പരാജയം നേരിട്ടതോടെ ഈ പണം വെള്ളത്തിലുമായി. അതേസമയം, ബംഗാളിൽ തൃണമൂൽ കോൺഗ്രസ് 154.28 കോടി രൂപയാണ് തെരഞ്ഞെടുപ്പിന് ചെലവാക്കിയത്. കേരളത്തിൽ 29.24 കോടി രൂപയാണ് നിയമസഭാ തെരഞ്ഞെടുപ്പിന് ബി.ജെ.പി ചെലവാക്കിയത്. തെരഞ്ഞെടുപ്പ് ഫലം വന്നപ്പോൾ ആകെയുണ്ടായിരുന്ന ഒരു സീറ്റ് കൂടി കൈവിട്ടതു മിച്ചം. തമിഴ്നാട്ടിലാകട്ടെ 22.97 കോടി ചെലവാക്കി. ഡി.എം.കെ അധികാരം തിരികെ പിടിച്ച തമിഴ്നാട്ടിൽ ബി.ജെ.പിക്ക് കിട്ടിയത് 2.6 ശതമാനം വോട്ട് മാത്രമാണ്. പുതുച്ചേരിയിൽ 4.79 കോടി രൂപയും അസമിൽ 43.81 കോടി രൂപയുമാണ് ബി.ജെ.പി പ്രചാരണത്തിന് ചെലവാക്കിയതെന്ന് തെരഞ്ഞെടുപ്പ് കമ്മിഷന് നൽകിയ കണക്കിൽ പറയുന്നു. ഇനി ബി.ജെ.പിക്ക് തെരഞ്ഞെടുപ്പിൽ പ്രധാനമായും പണം മുടക്കാനുള്ളത് ഉത്തർപ്രദേശിലാണ്. ഏതാനും മാസങ്ങൾക്കകം ഉത്തർപ്രദേശിൽ നിയമസഭാ തെരഞ്ഞെടുപ്പ് നടക്കും. ഉത്തർപ്രദേശിലെ ജനവിധി ബി.ജെ.പിക്കും പ്രതിപക്ഷ സഖ്യത്തിനും ഏറെ നിർണായകമാണ്.