ന്യൂഡല്‍ഹി: കാര്‍ഷിക നിയമങ്ങള്‍ പിന്‍വലിക്കാന്‍ കേന്ദ്രം തയ്യാറായത് ജനാധിപത്യത്തിന്റെ വിജമെന്ന് കോണ്‍ഗ്രസ് നേതാവ് എ.കെ ആന്റണി. അതേസമയം ഇത് വൈകിയെത്തിയ നീതിയാണെന്ന് അദ്ദേഹം ചൂണ്ടിക്കാട്ടി. ഇനിയിങ്ങനെ ഒരു നിയമം കൊണ്ടുവരാനോ ഇത്തരമൊരു അബദ്ധം കാണിക്കാനോ തെരഞ്ഞെടുപ്പ് അടുത്തിരിക്കുന്ന ഈ സാഹചര്യത്തില്‍ കേന്ദ്രം മുതിരില്ലെന്നും അദ്ദേഹം പറഞ്ഞു.

ഇന്ന് രാവിലെ രാജ്യത്തെ അഭിംസബോധന ചെയ്തു നടത്തിയ പ്രസംഗത്തില്‍ പ്രധാനമന്ത്രി തന്നെയാണ് നിയമങ്ങള്‍ പിന്‍വലിക്കുന്ന കാര്യം അറിയിച്ചത്. ഈ മാസം അവസാനത്തോടെ നിയമം ഇല്ലാതാകും. നിയമത്തിനെതിരായ കര്‍ഷകര്‍ ആരംഭിച്ച സമരം ഒരു വര്‍ഷം തികയാനിരിക്കുകയാണ്. ഉത്തര്‍പ്രദേശിലും പഞ്ചാബിലും തെരഞ്ഞെടുപ്പിന് നാളുകള്‍ മാത്രമാണ് ബാക്കിയുള്ളത്. കര്‍ഷകരുടെ ഇടഞ്ഞു നില്‍പ് ഇവിടങ്ങളില്‍ പ്രതികൂലമാവും എന്നതു കൊണ്ടു കൂടിയാണ് ഇപ്പോള്‍ കേന്ദ്രത്തിന്റെ ഇത്തരത്തിലൊരു നീക്കം.