എടപ്പാള്‍: സംസ്ഥാനത്തെ സാംസ്‌കാരിക മേഖലയ്ക്കു കെ.ദാമോദരന്റെ സംഭാവന വിലപ്പെട്ടതാണെന്നു മന്ത്രി കെ.ടി.ജലീല്‍. സാഹിത്യം സംസ്‌കാരം, രാഷ്ട്രിയം, തത്വചിന്ത മേഖലകളില്‍ കേരളത്തിന് ആശയപരമായ അടിത്തറപാകിയ കെ.ദാമോദരന്റെ സംഭാവനകള്‍ വിലപ്പെട്ടതാണ്.  'കെ.ദാമോദരന്‍ കാലവും ചിന്തയും'സെമിനാര്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
പൊന്നാനി ബ്ലോക്ക് പഞ്ചായത്ത് പ്രസിഡന്റ് അഡ്വ.പി.പി.മോഹന്‍ദാസ് അധ്യക്ഷനായി.തുടര്‍ന്നു കെ.ദാമോദരന്റെ സാഹിത്യ ചിന്തകള്‍ എന്ന വിഷയം എം.എം.നാരായണനും ഓര്‍മയിലെ ദാമോദരന്‍ അനുസ്മരണം വി.സി കമലവും നടത്തി. ഉച്ചയ്ക്കു ശേഷം എ. പി. അഹമ്മദ്, ഡോ.കെ.എന്‍.ഗണേശ്, മുഹമ്മദ് മുഹ്‌സിന്‍ എംഎല്‍എ വിവിധ വിഷയങ്ങള്‍ അവതരിപ്പിച്ചു. ജില്ലാ പഞ്ചായത്തംഗം അഡ്വ. എം.ബി.ഫൈസല്‍ അധ്യക്ഷനായി.