മുഹമ്മ: മാരാരിക്കുളം വടക്ക്, ചേര്‍ത്തല തെക്ക് പഞ്ചായത്തുകളില്‍ തെരുവ് നായ ശല്യം രൂക്ഷമായി. കൂട്ടമായി അലഞ്ഞു തിരിയുന്ന നായ്ക്കള്‍ നാട്ടുകാരെ ഭീതിയിലാഴ്ത്തിയിരിക്കുകയാണ്. നിരവധി പേര്‍ പട്ടികളുടെ ആക്രമണത്തിനും ഇരയായിട്ടുണ്ട്. നൂറുകണക്കിന് നായ്ക്കളാണ് ഇരു പഞ്ചായത്തുകളിലേയും വിവിധ ഭാഗങ്ങളില്‍ തെരുവ് വാഴുന്നത്. കുട്ടികളും മുതിര്‍ന്നവരുമടക്കമുള്ള നാട്ടുകാര്‍ ഭീതിയോടെയാണ് തെരുവിലിറങ്ങി നടക്കുന്നത്. കഴിഞ്ഞ ദിവസം ചേര്‍ത്തല തെക്ക് പഞ്ചായത്തില്‍ ബൈക്ക് യാത്രികരായ രണ്ട് യുവാക്കളെ തെരുവുനായ്ക്കള്‍ പിന്തുടര്‍ന്ന് ആക്രമിച്ചിരുന്നു.
  മാരാരിക്കുളം റെയില്‍വേ സ്‌റ്റേഷനിലും സമീപ പ്രദേശങ്ങളും നായകളുടെ വിഹാര കേന്ദ്രമാണ്. റെയില്‍വേ സ്റ്റേഷനിലേയ്ക്കു പോയ യാത്രക്കാരെ നായ്ക്കള്‍ കൂട്ടം ചേര്‍ന്ന് ആക്രമിച്ച സംഭവങ്ങളുമുണ്ടായിട്ടുണ്ട്. ഗ്രാമീണ റോഡുകളിലും നായ ശല്യം രൂക്ഷമാണ്. പട്ടികള്‍ കുറുകെ ചാടുന്നതിനാല്‍ ബൈക്ക് യാത്രികര്‍ക്ക് ഇതേറെ ഭീഷണിയാണ്. തെരുവ് നായ്ക്കളെ നിയന്ത്രിക്കാന്‍ നിലവില്‍ തദ്ദേശ സ്ഥാപനങ്ങള്‍ യാതൊരു നടപടിയും സ്വീകരിച്ചിട്ടില്ല. വിഷയത്തില്‍ അധികൃതര്‍ അടിയന്തിരമായി ഇടപെടണമെന്നാണ് നാട്ടുകാര്‍ ആവശ്യപ്പെടുന്നത്.