മുസ്‌ലിങ്ങള്‍ ഭൂരിപക്ഷമായ പ്രദേശങ്ങളിലെ ബൂത്തുകളില്‍ പ്രശ്‌നങ്ങള്‍ ഉണ്ടാക്കണമെന്നും, വിഷയത്തില്‍ പൊലിസിന്റെ ഇടപെടല്‍ ഒഴിവാക്കാന്‍ കൈക്കൂലി നല്‍കണമെന്നും ആഹ്വാനം ചെയ്ത ബിജെപി നേതാവ് പിടിയില്‍.ഉത്തര്‍ പ്രദേശിലെ സംഭാല്‍ ലോക്‌സഭാ മണ്ഡലത്തിലാണ് സംഭവം. ബി.ജെ.പി സെക്രട്ടറി ഭുവനേഷ് വര്‍ഷ്‌നേയയുടെ സന്ദേശമാണ് വിവാദമായത്.മുസ്‌ലിം ഭൂരിപക്ഷമുള്ള പ്രദേശമാണ് സംഭാല്‍. ബൂത്തിന് പുറത്ത് ധാരാളം സ്ത്രീകളെ കണ്ടാല്‍ പ്രശ്‌നമുണ്ടാക്കണമെന്നും അപ്പോള്‍ അവര്‍ വോട്ട് ചെയ്യാതെ മടങ്ങുമെന്നുമാണ് നേതാവിന്റെ സന്ദേശം.

പൊലീസ് വിഷയത്തില്‍ ഇടപെടാതിരിക്കാന്‍ അവര്‍ക്ക് കൈക്കൂലി നല്‍കണമെന്ന് പറയുന്നതും സന്ദേശത്തില്‍ കേള്‍ക്കാം. ബെഹ്ജോയ് പട്ടണത്തില്‍ പാര്‍ട്ടി പ്രവര്‍ത്തകരുടെ യോഗത്തിനിടെയാണ് ഈ നിര്‍ദേശങ്ങള്‍ നല്‍കിയത്.അതേസമയം, ഈ വിഡിയോ പഴയതാണെന്നും ഇപ്പോള്‍ വൈറലാവുകയായിരുന്നെന്നും പൊലീസ് അറിയിച്ചു. ഭുവനേഷ് വര്‍ഷ്‌നേയയെ കസ്റ്റഡിയിലെടുത്തിട്ടുണ്ട്. വിഷയം അന്വേഷിക്കുകയാണെന്നും പൊലീസ് പറഞ്ഞു. മെയ് ഏഴിനാണ് ഇവിടെ തെരഞ്ഞെടുപ്പ്.