കോഴിക്കോട്:  വിനോദ സഞ്ചാരികള്‍ക്ക് സന്തോഷ വാര്‍ത്ത. കോഴിക്കോട് നിന്ന് ആറായിരം രൂപയ്ക്ക് മലേഷ്യക്ക് പറക്കാമെന്ന് എയര്‍ ഏഷ്യ. ഈ മാസം മുതല്‍ യാത്രക്കാര്‍ക്ക് ഈ ടിക്കറ്റ് നിരക്കില്‍ യാത്ര ചെയ്യാനാകുമെന്ന് അറിയിച്ച് എയര്‍ഏഷ്യ. നിലവില്‍ വിസ കൂടാതെ തന്നെ മലേഷ്യയിലേക്ക് വിനോദ സഞ്ചാരം അനുവദിക്കുന്ന സാഹചര്യത്തില്‍ ഈ വിമാന സര്‍വീസ് കൂടുതല്‍ സഞ്ചാരികളെ ആകര്‍ഷിക്കുക തന്നെ ചെയ്യും.

മലേഷ്യന്‍ ബജറ്റ് എയര്‍ലൈനായ എയര്‍ ഏഷ്യയാണ് ആഴ്ചയില്‍ മൂന്നു പ്രാവശ്യം വീതം സര്‍വീസ് നടത്തുക. കോഴിക്കോട് -ക്വലാലംപുര്‍ റൂട്ടിലാണ് ആദ്യഘട്ടത്തില്‍ സര്‍വീസ് നല്‍കുന്നത്. ഇതിന് പിന്നാലെ കോഴിക്കോട് -തായ്‌ലന്‍ഡ് സര്‍വീസും പരിഗണനയിലുണ്ടെന്ന് എയര്‍ ഏഷ്യ വ്യക്തമാക്കി. സര്‍വീസിനാവശ്യമായ ടൈം സ്ലോട്ടുകള്‍ കഴിഞ്ഞദിവസം എയര്‍ ഏഷ്യയ്ക്ക് അനുവദിച്ച് കിട്ടി.

 ഇതുപ്രകാരം 6000 രൂപ മുതല്‍ ടിക്കറ്റുകള്‍ ലഭിക്കുമെന്ന് കമ്പനിവൃത്തങ്ങള്‍ പറഞ്ഞു. ഇതിനു പുറമെ ഏജന്‍സി കമ്മീഷനുകള്‍ ഉണ്ടാകും. 180 പേര്‍ക്ക് യാത്രചെയ്യാവുന്ന എ 320 വിമാനമാണ് സര്‍വീസിന് ഉപയോഗിക്കുക. കോയമ്പത്തൂര്‍, മംഗളൂരു തുടങ്ങിയ സ്ഥലങ്ങളില്‍ നിന്നുള്ളവര്‍ക്കും എളുപ്പത്തില്‍ മലേഷ്യ, സിംഗപ്പൂര്‍, തായ്‌ലന്‍ഡ്, വിയറ്റ്നാം, ചൈന, ജപ്പാന്‍, ബാലി, ഓസ്ട്രേലിയ, ന്യൂസിലന്‍ഡ് തുടങ്ങിയ സ്ഥലങ്ങളിലേക്ക് ഇനി യാത്രചെയ്യാം.