കോഴിക്കോട്: പന്തീരാങ്കാവില്‍ ഭര്‍ത്താവില്‍ നിന്നും പെണ്‍കുട്ടി ഗാര്‍ഹിക പീഡനത്തിന് ഇരയായ സംഭവത്തില്‍ അന്വേഷണ വീഴ്ച വരുത്തിയ പൊലിസുകാര്‍ക്കെതിരെ നടപടി സ്വീകരിക്കണമെന്ന് ഡി.വൈ.എഫ്.ഐ. കേരളത്തിലെ പൊലിസ് നയത്തിന് വിരുദ്ധമായി സ്ത്രീപക്ഷ കേരളത്തിന് അപമാനകരമായ നിലപാട് സ്വീകരിച്ച പന്തീരാങ്കാവ് പൊലിസ് സ്‌റ്റേഷനിലെ ഉദ്യോഗസ്ഥര്‍ക്കെതിരെ വകുപ്പ് തല നടപടി സ്വീകരിക്കണമെന്നും ഡി.വൈ.എഫ്.ഐ ആവശ്യപ്പെട്ടു. 

വിഷയത്തില്‍ കുറ്റക്കാര്‍ക്കെതിരെയും അന്വേഷണത്തില്‍ വീഴ്ച വരുത്തിയ പൊലിസുകാര്‍ക്കെതിരെയും നടപടിയെടുക്കാന്‍ ഡി.വൈ.എഫ്.ഐ മുഖ്യമന്ത്രിക്ക് രേഖാമൂലം പരാതി നല്‍കും. 

നവവധുവിനെ മര്‍ദ്ദിച്ച കേസിന്റെ അന്വേഷണത്തില്‍ പന്തീരാങ്കാവ് പൊലിസിന് വീഴ്ച്ചയുണ്ടായെന്നാണ് കണ്ടെത്തല്‍. പെണ്‍കുട്ടിയുടെ മൊഴി ശരിയായ രൂപത്തില്‍ രേഖപ്പെടുത്താന്‍ പൊലിസ് തയ്യാറായില്ലെന്ന് ആക്ഷേപം ഉയര്‍ന്നിരുന്നു. അതേസമയം പന്തീരാങ്കാവ് ഗാര്‍ഹികപീഡനക്കേസിലെ പ്രതി പന്തീരങ്കാവ് വള്ളിക്കുന്ന് സ്‌നേഹതീരത്തില്‍ രാഹുല്‍ പി ഗോപാലിനെതിരേ പൊലിസ് ലുക്കൗട്ട് നോട്ടിസ് പുറപ്പെടുവിച്ചു. കേസെടുത്തതിനെ തുടര്‍ന്ന് ഇയാള്‍ ഒളിവില്‍പോയിരുന്നു. ഇതിന് പിന്നാലെയാണ് പൊലിസ് ലുക്കൗട്ട് നോട്ടിസ് പുറത്തിറക്കിയത്.