തിരുവനന്തപുരം: ചലച്ചിത്ര  സീരിയല്‍ താരം വിഷ്ണു പ്രസാദ് അന്തരിച്ചു. കരള്‍ രോഗത്തെ തുടര്‍ന്ന് ചികിത്സയില്‍ കഴിയുകയായിരുന്നു വിഷ്ണു പ്രസാദ്.. നടന്‍ കിഷോര്‍ സത്യയാണ് മരണവിവരം തന്റെ സമൂഹമാധ്യമത്തിലൂടെ അറിയിച്ചത്.

കുടുംബവും സഹപ്രവര്‍ത്തകരും കരള്‍ മാറ്റിവെക്കല്‍ ശസ്ത്രക്രിയക്കുള്ള ഒരുക്കത്തിലായിരുന്നു. മകളുടെ കരള്‍ സ്വീകരിക്കാനായിരുന്നു തീരുമാനം.  ചികിത്സക്കായി ഏകദേശം 30 ലക്ഷം രൂപയോളം ആവശ്യമായിരുന്നു. ഇത് കണ്ടെത്താനുള്ള ശ്രമത്തിലായിരുന്നു കുടുംബം. അതിനിടയിലാണ് മരണം.  സീരിയല്‍ താരങ്ങളുടെ സംഘടനയായ 'ആത്മ' അടിയന്തിര സഹായമായി ഒരു തുക നല്‍കിയിരുന്നു. ഓണ്‍ലൈന്‍ ചാരിറ്റി ഫണ്ടിങിലൂടെയും മറ്റും ബാക്കി തുക കണ്ടെത്താനായിരുന്നു തീരുമാനം.

കാശി, കൈ എത്തും ദൂരത്ത്, റണ്‍വേ, മാമ്പഴക്കാലം, ലയണ്‍, ബെന്‍ ജോണ്‍സണ്‍, ലോകനാഥന്‍ ഐ.എ.എസ്, പതാക, മാറാത്ത നാട് തുടങ്ങിയ സിനിമകളില്‍ അഭിനയിച്ചു. സീരിയല്‍ രംഗത്തും സജീവമായിരുന്നു വിഷ്ണു പ്രസാദ്.

Popular film and serial actor Vishnu Prasad dies while awaiting a liver transplant. The family was raising funds for surgery when the tragedy occurred.