കൊച്ചി :  മതന്യൂനപക്ഷങ്ങൾക്ക് ഇന്ത്യൻ ഭരണഘടന ഉറപ്പു നൽകുന്ന മതസ്വാതന്ത്ര്യവും മൗലികാവകാശങ്ങളും കവർന്നെടുക്കുന്ന വഖഫ് ദേദഗതി നിയമം പിൻവലിക്കണമെന്നാവശ്യപ്പെട്ടു കൊണ്ട് കേരളത്തിലെ പ്രമുഖ സുന്നി പണ്ഡിത സഭകളുടെ നേതൃത്വത്തിൽ രൂപീകരിച്ച ജംഇയ്യത്തുൽ ഉലമ കോർഡിനേഷൻ കമ്മിറ്റിയുടെ ആഭിമുഖ്യത്തിൽ മെയ് 4 ഞായർ വൈകിട്ട് 4 ന് കലൂർ ഇന്റർനാഷണൽ സ്റ്റേഡിയത്തിൽ നടക്കുന്ന പ്രതിഷേധ മഹാസമ്മേളനത്തിന്റെ ഒരുക്കങ്ങൾ പൂർണ്ണമായി.

മെയ് 4 ഞായറാഴ്ച അസർ നിസ്കാരം കഴിഞ്ഞ ഉടനെ സമ്മേളനം ആരംഭിക്കും. സമ്മേളന വിജയത്തിനായി ജില്ലയിലെ 7 താലൂക്കുകളിൽ പ്രത്യേകം കമ്മിറ്റി രൂപീകരിച്ച് പ്രചരണ പരിപാടികൾ നടന്നു വരുന്നു. 4 പണ്ഡിത സഭകളുടെയും കീഴിലുളള സന്നദ്ധ സേവന തൽപരരായ വിഖായ, സാന്ത്വനം സേവന ഗാർഡ്, ഇഫാള എന്നിവരുടെ യൂണിഫോം ധാരികളായ 313 വളന്റിയർമാർ ഉണ്ടാകും. വൈകിട്ട് 4.00 ന് കലൂർ മഹല്ല് ഖാസി സയ്യിദ് ടി എസ് സലാഹുദ്ധീൻ ബുഖാരി തങ്ങൾ കൂരിയാടിന്റെ പ്രാർത്ഥനയോടെ ആരംഭിക്കുന്ന സമ്മേളനം സമസ്ത കേരള ജംഇയ്യത്തുൽ ഉലമ പ്രസിഡന്റ് സയ്യിദുൽ ഉലമ സയ്യിദ് മുഹമ്മദ് ജിഫ്രി മുത്തുക്കോയ തങ്ങൾ ഉദ്ഘാടനം ചെയ്യും.കേന്ദ്ര മുശാവറ അംഗവും സ്വാഗത സംഘം ചെയർ മാനുമായ ഐ ബി ഉസ്മാൻ ഫൈസി ആധ്യഷത വഹിക്കും. 

ബദറുസ്സാദാത്ത് സയ്യിദ് ഇബ്രാഹീം ഖലീലുൽ ബുഖാരി തങ്ങൾ മുഖ്യപ്രഭാഷണം നിർവഹിക്കും. ദക്ഷിണ കേരള  ജംഇയ്യത്തുൽ ഉലമ ജനറൽ സെക്രട്ടറി തൊടിയൂർ മുഹമ്മദ് കുഞ്ഞ് മൗലവി അനുഗ്രഹ പ്രഭാഷണം നിർവഹിക്കും. കേരള സംസ്ഥാന ജംഇയ്യത്തുൽ ഉലമ ജനറൽ സെക്രട്ടറി ഹുജ്ജത്തുൽ ഉലമ നജീബ് മൗലവി മമ്പാട് വിഷയാവതരണം നടത്തും. സ്ഥലം എം.പി  ഹൈബി ഈഡൻ മുഖ്യ അതിഥിയാകും. പ്രമുഖ പ്രഭാഷകരായ ശുഹൈബുൽ ഹൈതമി, ഡോ.മുഹമ്മദ്കുഞ്ഞ് സഖാഫി കൊല്ലം, ജുനൈദ് കടക്കൽ, ബഷീർ വഹബി അടിമാലി എന്നിവർ വിവിധ വിഷയങ്ങൾ അധികരിച്ചു പ്രഭാഷണം നടത്തും  ദക്ഷിണ കേരള ജംഇയ്യത്തുൽ ഉലമ ജില്ല ജനറൽ സെക്രട്ടറി മുഹമ്മദ് തൗഫീഖ് മൗലവി ആമുഖ പ്രഭാഷണം നിർവ്വഹിക്കും..സമ്മേളന ചീഫ് കോർഡിനേറ്റർ സി ടി ഹാഷിം തങ്ങൾ പ്രമേയ അവതരണം നടത്തും. കേരള മുസ്ലിം ജമാഅത്ത് ജില്ല പ്രസിഡന്റ് വി.എച്ച് അലി ദാരിമി സ്വാഗതവും എ.എം. പരീദ് നന്ദിയും പറയും. മഹല്ല് ഇമാമീങ്ങൾ, മസ്ജിദ് പരിപാലന സമിതി അംഗങ്ങൾ, ബഹുജനങ്ങളുൾപ്പെടെ പതിനായിരങ്ങൾ  സമ്മേളനത്തിൽ പങ്കെടുക്കും.