തൃപ്രയാര്‍: ദലിത് പീഡനങ്ങള്‍ക്കെതിരേ പ്രവര്‍ത്തിക്കുന്ന സംഘടനകളുടെയും സമുദായങ്ങളുടെയും പൊതുവേദി രൂപീകരിക്കാന്‍ കെ.പി.എം.എസ് മുന്‍കൈയെടുക്കുമെന്ന് ജനറല്‍ സെക്രട്ടറി പി.എം വിനോദ് പറഞ്ഞു.
മഹാത്മാ അയ്യന്‍കാളി അനുസ്മരണ സമിതി തൃപ്രയാറില്‍ സംഘടിപ്പിച്ച അയ്യന്‍കാളി ജന്മദിനാഘോഷം ഉദ്ഘാടനം ചെയ്യുകയായിരുന്നു അദ്ദേഹം. രാജ്യമെങ്ങും വര്‍ധിച്ചു വരുന്ന ദലിത് പീഡനങ്ങള്‍ക്കും അവകാശ നിഷേധങ്ങള്‍ക്കുമെതിരേ യോജിച്ച പോരാട്ടങ്ങളാണ് ഉണ്ടാകേണ്ടത്. അതിന് രാഷ്ട്രീയ, സാമുദായിക വ്യത്യാസങ്ങള്‍ തടസമാകരുത്.
പട്ടികജാതി, പട്ടിക വര്‍ഗക്കാരുടെ താല്പര്യം സംരക്ഷിക്കുകയും അതിനായി പ്രവര്‍ത്തിക്കുകയും ചെയ്യുന്നവരുടെ സാഹോദര്യം വളര്‍ത്തിയെടുക്കുന്നതിലൂടെ മാത്രമേ ഇന്നത്തെ അവസ്ഥയ്ക്ക് മാറ്റം വരുത്താനാകൂ. അതിന് ആദ്യം വേണ്ടത് സമുദായസംഘടനകളുടെ ഐക്യമാണ്. വ്യത്യസ്താഭിപ്രായങ്ങള്‍ നിലനിര്‍ത്തിക്കൊണ്ടു തന്നെ പൊതുവായ ആവശ്യങ്ങള്‍ക്കായി യോജിച്ച പോരാട്ടങ്ങള്‍ക്ക് രംഗത്തിറങ്ങണം. കെ.പി.എം.എസ് അതിന്റെ പഴയകാല നിലപാടുകളെ പുനപ്പരിശോധിച്ചുവരികയാണ്. അയ്യന്‍കാളിയുടെ ജന്മദിനം ആഘോഷിക്കുന്നത് ഈ ലക്ഷ്യത്തോടെയാണെന്നും വിനോദ് പറഞ്ഞു. ദലിതുകളുടെ വിശാലമായ ഐക്യത്തിലൂടെല്ലാതെ ഇനി മുന്നോട്ടുപോകാനാവില്ലെന്ന തിരിച്ചറിവ് വിവിധ സമുദായസംഘടനകള്‍ക്കുണ്ട്.
കേരളത്തില്‍ നടക്കുന്ന ദലിത് ശാക്തീകരണപ്രവര്‍ത്തനങ്ങള്‍ അതിന്റെ ഭാഗമാണ്. കേരളത്തിലും ഗുജറാത്തിലും ഒക്കെ നടക്കുന്ന ദലിത് പീഡനങ്ങള്‍ക്കെതിരായ പ്രവര്‍ത്തനങ്ങള്‍ക്ക്, പ്രക്ഷോഭങ്ങള്‍ക്ക് കെ.പി.എം.എസിന്റെ പിന്തുണയുണ്ടാകുമെന്നും അദ്ദേഹം പറഞ്ഞു. സമിതി പ്രസിഡന്റ് എ.കെ സന്തോഷ് അധ്യക്ഷനായി. ബഹുജന്‍ സാഹിത്യ അക്കാദമി ഡയറക്ടര്‍ രമേഷ് നന്മണ്ട മുഖ്യപ്രഭാഷണം നടത്തി. സന്തോഷ് രചിച്ച ബാബാ സാഹേബ് അംബേദ്കറും മഹാത്മാ അയ്യന്‍കാളിയും ദലിത് രാഷ്ട്രീയവും എന്ന പുസ്തകം കെ.സി. അര്‍ജുന് കോപ്പി നല്‍കി രമേഷ് നന്മണ്ട പ്രകാശനം ചെയ്തു.
ദലിത് എംപ്ലോയീസ് ആന്‍ഡ് പെന്‍ഷനേഴ്‌സ് അസോസിയേഷന്‍ ജനറല്‍ സെക്രട്ടറി മണികണ്ഠന്‍ കാട്ടാമ്പിള്ളി, വേട്ടുവ മഹാസഭ സംസ്ഥാന സെക്രട്ടറി ടി.എസ്. ജയചന്ദ്രന്‍, പടന്ന മഹാസഭ സംസ്ഥാന വൈസ് പ്രസിഡന്റ് സി.എം രാധാകൃഷ്ണന്‍, ഭാരതീയ പട്ടികജനസമാജം ജില്ലാ ട്രഷറര്‍, ബി.എസ്.പി ജില്ലാ കമ്മറ്റി അംഗം എ.പി ഉദയകുമാര്‍ എന്നിവര്‍ പ്രസംഗിച്ചു. ഇ.പി കാര്‍ത്തികേയന്‍ സ്വാഗതവും വിജയന്‍ വല്ലച്ചിറ നന്ദിയും പറഞ്ഞു.