ഫറോക്ക്: നിറയെ യാത്രക്കാരുമായി പോവുകയായിരുന്ന സ്വകാര്യ ബസിനു പിന്നില്‍ ലോറിയിടിച്ചു ബസ് ഡ്രൈവറുള്‍പ്പെടെ നിരവധി പേര്‍ക്ക് പരുക്ക്. ദേശീയ പാത 66-ല്‍ ചെറുവണ്ണൂര്‍ കരുണ ബസ്‌സ്റ്റോപ്പിനടുത്ത് തിങ്കളാഴ്ച രാവിലെ 9.45നായിരുന്നു അപകടം. മണ്ണൂര്‍റെയില്‍ - മെഡിക്കല്‍ കോളജ് റൂട്ടിലോടുന്ന എം.എസ്.പി ബസിന്റെ പിറകിലാണ് ലോറിയിടിച്ചത്.
അപകടത്തില്‍ പരുക്കേറ്റ ബസ് ഡ്രൈവര്‍ മണ്ണൂര്‍ വടക്കുമ്പാട് ചന്ദ്രലാല്‍ (30), ദേവി (40) എന്നിവരെ മെഡിക്കല്‍ കോളജിലും വടക്കുമ്പാട് സ്വദേശികളായ അഭിനവ് ഉള്‍പ്പെടെ ഏതാനും പേരെ ചെറുവണ്ണൂരിലെ സ്വകാര്യ ആശുപത്രിയിലും പ്രവേശിപ്പിച്ചു. നിസാര പരുക്കു പറ്റിയവരെ പ്രഥമ ചികിത്സ നല്‍കി വിട്ടയച്ചു.
ചെറുവണ്ണൂര്‍ ഭാഗത്തുനിന്നും കോഴിക്കോട്ടേക്ക് പോവുകയായിരുന്ന ബസ്, സ്‌റ്റോപ്പില്‍ നിന്നു യാത്രക്കാരെ കയറ്റി പുറപ്പെടാനൊരുങ്ങവെ അമിത വേഗതയില്‍ വന്ന ലോറി ഇടിക്കുകയായിരുന്നു. ഇടിയുടെ ആഘാതത്തില്‍ ബസിന്റെ ചില്ലുതെറിച്ചും നിലത്തു വീണുമാണ് യാത്രക്കാര്‍ക്ക് പരുക്കുപറ്റിയത്. സംഭവത്തില്‍ ബസിന്റെ പിന്‍ഭാഗവും ലോറിയുടെ മുന്‍ഭാഗവും പാടെ തകര്‍ന്നിട്ടുണ്ട്.