ഫലസ്തീനെ രാഷ്ട്രമായി അംഗീകരിച്ച തീരുമാനം സ്‌പെയിനും നോര്‍വേയും അയര്‍ലന്‍ഡും ഔദ്യോഗികമായി പ്രഖ്യാപിച്ചു.ഗാസയില്‍ ഇസ്‌റാഈല്‍ കൂട്ടക്കുരുതി തുടരുന്ന പശ്ചാത്തലത്തിലാണ് നടപടി. ഇതോടെ, ഐക്യരാഷ്ട്ര സഭയുടെ 193 അംഗങ്ങളില്‍ ഫലസ്തീന്‍ രാജ്യത്തിന് അംഗീകാരം നല്‍കിയ രാജ്യങ്ങളുടെ എണ്ണം 146 ആയി.പശ്ചിമേഷ്യയില്‍ സമാധാനം കൊണ്ടുവരാനുള്ള ഒരേയൊരു മാര്‍ഗം ഫലസ്തീനെ രാഷ്ട്രമായി അംഗീകരിക്കുക മാത്രമാണെന്ന് സ്പാനിഷ് പ്രധാനമന്ത്രി പെഡ്രോ സാഞ്ചെസ് രാജ്യത്തെ അഭിസംബോധന ചെയ്ത് നടത്തിയ പ്രസംഗത്തില്‍ പറഞ്ഞു. 

ചരിത്രപരമായ നീതിയാണ് നടപ്പായതെന്നും അദ്ദേഹം പറഞ്ഞു. സമാധാനം സ്ഥാപിക്കുന്നതിനുള്ള ഏക മാര്‍ഗം ഇസ്‌റാഈല്‍ രാഷ്ട്രത്തോട് ചേര്‍ന്ന് ജീവിക്കുന്ന ഫലസ്തീന്‍ രാഷ്ട്രം സ്ഥാപിക്കുക എന്നതാണ്. കിഴക്കന്‍ ജറൂസലേം തലസ്ഥാനമായിക്കൊണ്ട് വെസ്റ്റ് ബാങ്കും ഗസ്സയും ഉള്‍പ്പെട്ടതാവണം ഫലസ്തീന്‍ രാഷ്ട്രം. രണ്ടിനെയും ഇടനാഴി വഴി ബന്ധിപ്പിക്കണമെന്നും സ്പാനിഷ് പ്രധാനമന്ത്രി പറഞ്ഞു. 

ഫലസ്തീനെ രാഷ്ട്രമായി അംഗീകരിച്ചതിന്റെ ഭാഗമായി ഐറിഷ് പാര്‍ലമെന്റിന് പുറത്ത് ഫലസ്തീന്‍ പതാക ഉയര്‍ത്തി.അതേസമയം നേരത്തെ, നോര്‍വേയും അയര്‍ലന്‍ഡും സ്‌പെയിനും ഫലസ്തീന് രാഷ്ട്രമായി അംഗീകാരം നല്‍കുന്നതില്‍ പ്രതിഷേധിച്ച് ഇസ്‌റാഈല്‍ മൂന്ന് രാഷ്ട്രങ്ങളില്‍ നിന്നും തങ്ങളുടെ അംബാസഡര്‍മാരെ തിരിച്ചുവിളിച്ചിരുന്നു. തീവ്രവാദത്തെ അംഗീകരിക്കുകയാണ് അയര്‍ലന്‍ഡും നോര്‍വേയും സ്‌പെയിനും ചെയ്യുന്നതെന്നാണ് ഇസ്‌റാഈല്‍ വിദേശകാര്യ മന്ത്രി ഇസ്‌റാഈല്‍ കാത്സ് പ്രതികരിച്ചത്.