ലാത്തൂര്‍: ബി.ജെ.പി സ്ഥാനാര്‍ഥി തെരഞ്ഞെടുപ്പില്‍ പരാജയപ്പെട്ടാല്‍ ജീവനൊടുക്കുമെന്ന് വീഡിയോ ഇറക്കിയ ട്രക്ക് ഡ്രൈവര്‍ മരിച്ച നിലയില്‍. മഹാരാഷ്ട്രയിലെ ലാത്തൂര്‍ സ്വദേശിയായ സച്ചിന്‍ കോണ്ഡിബ മുണ്ഡെ (38) യെയാണ് ബസിനടിയില്‍പ്പെട്ട് മരിച്ച നിലയില്‍ കണ്ടെത്തിയത്. ബീഡ് മണ്ഡലത്തിലെ ബി.ജെ.പി സ്ഥാനാര്‍ഥി പങ്കജ മുണ്ഡെ പരാജയപ്പെട്ടാല്‍ താന്‍ ജീവിച്ചിരിക്കില്ലെന്ന് മുന്നറിയിപ്പ് നല്‍കി സച്ചിന്‍ നേരത്തെ വീഡിയോ പോസ്റ്റ് ചെയ്തിരുന്നു. 

അഹ്മദ്പൂര്‍- അന്ധേരി റോഡില്‍ ബാര്‍ഗോവോണിന് സമീപം വെള്ളിയാഴ്ച്ച രാത്രി 9 മണിക്കായിരുന്നു ബസ് അപകടം. നിര്‍ത്തിയിട്ട ബസ് പിന്നോട്ടെടുക്കുന്നതിനിടെ പുറകില്‍ നിന്ന സച്ചിന്റെ ശരീരത്തിലൂടെ കയറിയിറങ്ങുകയായിരുന്നു. സംഭവത്തില്‍ ബസ് ഡ്രൈവറെ പൊലിസ് കസ്റ്റഡിയിലെടുത്തിട്ടുണ്ട്. 

ബീഡ് മണ്ഡലത്തിലെ പോരാട്ടത്തില്‍ എന്‍.സി.പി ബജ്‌റംഗ് സോനവാനെയോട് 6553 വോട്ടുകള്‍ക്കാണ് പങ്കജ് മുണ്ഡെ പരാജയപ്പെട്ടത്. ഫലം പുറത്ത് വന്നതിന് പിന്നാലെ സച്ചിന്‍ വിഷാദത്തിലായിരുന്നുവെന്ന് ബന്ധുക്കള്‍ പറയുന്നു. അതുകൊണ്ട് തന്നെ സച്ചിന്റെ മരണം ആത്മഹത്യയാണെന്ന സംശയവും ബലപ്പെടുകയാണ്. സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.