കേരളത്തിലെ വൈദ്യുതി ഉപഭോഗം റെക്കോര്‍ഡ് തൊട്ടതോടെ ആശങ്കയിലാണ് സര്‍ക്കാര്‍. പീക്ക് അവറില്‍ അത്യാവശ്യമില്ലാത്ത ലൈറ്റുകളും മറ്റും ഓഫ് ചെയ്ത് വൈദ്യുതി ഉപഭോഗം കുറയ്ക്കാന്‍ സഹകരിക്കണമെന്നാണ് ഉപയോക്താക്കളോടുള്ള കെ.എസ്.ഇ.ബിയുടെ അഭ്യര്‍ഥന. ഇതിന്റെ ഭാഗമായി കഴിഞ്ഞ ദിവസങ്ങളില്‍ വാഷിങ് മെഷീന്‍, എസി എന്നിവ ഉപയോഗിക്കുമ്പോള്‍ ശ്രദ്ധിക്കേണ്ട കാര്യങ്ങള്‍ കെ.എസ്.ഇ.ബി തങ്ങളുടെ ഫേസ്ബുക്ക് പേജില്‍ പങ്കുവെച്ചിരുന്നു. 

ഇപ്പോഴിതാ ടെലിവിഷന്‍ ഉപഭോഗത്തെ കുറിച്ച് ജനങ്ങളെ ബോധവല്‍ക്കരിക്കുകയാണ് കെ.എസ്.ഇ.ബി. വീടുകളില്‍ ദിവസം മുഴുവന്‍ ഉപയോഗിക്കുന്ന ഇലക്ട്രോണിക് ഉപകരണമെന്ന നിലയില്‍ ടി.വിക്ക് വൈദ്യുതി ഉപഭോഗം കൂടുതലാണ്. അതുകൊണ്ട് തന്നെ വൈദ്യുതി ചെലവ് ലാഭിച്ച് എങ്ങനെ ടി.വി ഉപയോഗിക്കാമെന്ന് പറഞ്ഞുതരികയാണ് കെ.എസ്.ഇ.ബി. 

കുറിപ്പിന്റെ പൂര്‍ണ്ണരൂപം

'ടെലിവിഷന്‍ റിമോട്ട് കണ്‍ട്രോളറില്‍ ഓഫ് ചെയ്ത് എഴുന്നേറ്റ് പോകുന്നവരാണ് നമ്മളിലധികവും. റിമോട്ടില്‍ ഓഫ് ചെയ്താലും ടി.വി ചെറിയ തോതില്‍ വൈദ്യുതി ഉപയോഗിച്ച് കൊണ്ടിരിക്കും. വൈദ്യുതി പാഴാവുകയും ചെയ്യും. ഇതൊഴിവാക്കുന്നതിനായി പ്ലഗിന് സമീപമുള്ള സ്വിച്ചും ഓഫ് ചെയ്യുന്നത് ശീലമാക്കാം'- കെ.എസ്.ഇ.ബി ഫെയ്‌സ്ബുക്കില്‍ കുറിച്ചു.'