ദുബൈ: നിങ്ങളുടെ റെസിഡൻസി വിസ പതുക്കാൻ ഒരു മെഡിക്കൽ ടെസ്റ്റിന് പോകാൻ സമയമില്ലാത്തവരിൽ ഒരാളാണോ നിങ്ങൾ? ഇനി വിഷമിക്കേണ്ടതില്ല. ദുബൈയിലെ പ്രവാസികൾക്ക് അവരുടെ വീട്ടിലുരുന്ന് ഇനി മെഡിക്കൽ ടെസ്റ്റ് നടത്താം. വിഎഫ്എസ് ഗ്ലോബലും എഎംഎച്ച്സും ചേർന്ന് 'മെഡിക്കൽ എക്സാമിനേഷൻ ഡോർസ്റ്റെപ്പ് സർവിസ്' ആരംഭിച്ചു. ഇതുവഴി ദുബൈയിൽ യുഎഇ റസിഡൻസ് വിസയുള്ള പ്രവാസികൾക്ക് നിയുക്ത മെഡിക്കൽ സെൻ്റർ സന്ദർശിക്കാതെ തന്നെ അവരുടെ മെഡിക്കൽ ടെസ്റ്റ് നടത്താം.

മെഡിക്കൽ എക്സാമിനേഷൻ ഡോർസ്റ്റെപ്പ് സേവനം വിഎഫ്എസ് ഗ്ലോബൽ വഴി പ്രീമിയം ഓഫറായി ലഭ്യമാകും. റെസിഡൻസി വിസ പുതുക്കാൻ ആഗ്രഹിക്കുന്ന കാറ്റഗറി എ വിസ ഉടമകൾക്ക് ഈ സേവനം പ്രത്യേകം നൽകുന്നു. കേന്ദ്രങ്ങളിൽ നൽകുന്ന സ്റ്റാൻഡേർഡ് മെഡിക്കൽ പരിശോധനാ സേവനങ്ങളിലേക്കുള്ള ഓപ്ഷണൽ ആഡ്-ഓൺ ആണ് ഇത്. ആരോഗ്യ സേവനങ്ങൾ കൂടുതൽ എളുപ്പത്തിൽ ലഭ്യമാക്കാനുള്ള എമിറേറ്റ്സ് ഹെൽത്ത് സർവിസസിൻ്റെ (ഇഎച്ച്എസ്) നടപടിയുടെ ഭാഗമായാണ് പുതിയ സർവിസ്. 

ഉപഭോക്താക്കൾക്ക് അവരുടെ വീടുകളിൽ നിന്നോ ഓഫീസുകളിൽ നിന്നോ ഒരു ഓൺലൈൻ അല്ലെങ്കിൽ ഓഫ്‌ലൈൻ പ്രക്രിയയിലൂടെ നേരിട്ട് അവരുടെ മെഡിക്കൽ പരിശോധന അപ്പോയിൻ്റ്മെൻ്റുകൾ ബുക്ക് ചെയ്യാം.

ആവശ്യമുള്ള രേഖകൾ

* പാസ്പോർട്ട് കോപ്പി
* താമസാനുമതി/വിസ കോപ്പി
* വെള്ള പശ്ചാത്തലമുള്ള 1 പാസ്‌പോർട്ട് സൈസ് ഫോട്ടോ (ഫോട്ടോഗ്രാഫിന് 3 മാസത്തിൽ കൂടുതൽ പഴക്കമുണ്ടാകരുത്)
* എമിറേറ്റ്സ് ഐഡി കോപ്പി

പ്രക്രിയ

* VFS ഗ്ലോബലിന്റെ  https://visa.vfsglobal.com/ehs/en/are എന്ന വെബ്‌സൈറ്റ് സന്ദർശിക്കുക. 'Medical Examination At Your Doorstep' എന്ന ലിങ്കിൽ ക്ലിക്ക് ചെയ്യുക. 
* നൽകിയിട്ടുള്ള ഓൺലൈൻ ഫോം പൂരിപ്പിച്ച് ആവശ്യമായ ഡോക്യുമെൻ്റുകൾ അപ്‌ലോഡ് ചെയ്യുക. ശേഷം, പേയ്‌മെൻ്റ് ലിങ്കുള്ള ഒരു ഇമെയിൽ സ്ഥിരീകരണം നിങ്ങൾക്ക് ലഭിക്കും.
* പേയ്‌മെൻ്റ് പൂർത്തിയാകുമ്പോൾ, VFS ഗ്ലോബൽ ടീം ആപ്ലിക്കേഷൻ പ്രോസസ്സിംഗ് കൈകാര്യം ചെയ്യുകയും ഉപഭോക്താവ് തിരഞ്ഞെടുത്ത സ്ഥലത്ത്, അത് അവരുടെ താമസസ്ഥലമോ ഓഫീസോ ആകട്ടെ, സുഗമമായ സേവന ഡെലിവറി എത്തിക്കുകയും ചെയ്യും.

ഫീസ്

* എ വിഭാഗത്തിനുള്ള മെഡിക്കൽ പരിശോധന: 261.86 ദിർഹം
* ഫോം പൂരിപ്പിക്കൽ മെഡിക്കൽ: 52 ദിർഹം
* VFS സേവന ഫീസ്: 110 ദിർഹം 
* വാതിൽപ്പടി സേവനം: 426.15 ദിർഹം 
* ആകെ: 850.01 ദിർഹം