ന്യൂഡൽഹി: നീറ്റ് പി.ജി പരീക്ഷയുടെ പുതുക്കിയ തീയതി പ്രഖ്യാപിച്ചു. നാഷണൽ ടെസ്റ്റിംഗ് ഏജൻസി (എൻ.ടി.എ) ആണ് പുതിയ തിയതി പ്രഖ്യാപിച്ചത്​. ഓഗസ്റ്റ് 11 ന് ആണ് പരീക്ഷ നടക്കുക. രണ്ട് ഷിഫ്റ്റുകളായിട്ടാണ് പരീക്ഷ നടത്തുകയെന്ന് നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ് (NBEMS) അറിയിച്ചു. 

വിവാദങ്ങളുടെ പശ്ചാത്തലത്തിൽ പരീക്ഷക്ക് രണ്ട് മണിക്കൂര്‍ മുമ്പാകും അന്തിമ ചോദ്യപ്പേപ്പര്‍ തയാറാക്കുക. ജൂൺ 23ന് ആയിരുന്നു പരീക്ഷ നടക്കേണ്ടിയിരുന്നത്. എന്നാൽ നീറ്റ്, നെറ്റ് പരീക്ഷകളുടെ ചോദ്യപ്പേപ്പര്‍ ചോർച്ചയെ തുടർന്ന് പരീക്ഷ റദ്ദാക്കുകയായിരുന്നു. ചോദ്യപ്പേപ്പര്‍ ചോര്‍ച്ചയുള്‍പ്പെടെ നിരവധി ക്രമക്കേടുകള്‍ നടന്നിട്ടുണ്ടെന്ന വിവരത്തെ തുടര്‍ന്ന് പരീക്ഷകൾ റദ്ദാക്കുകയായിരുന്നു. സംഭവം വിവാദമായതോടെ പ്രതിപക്ഷം ലോക്സഭയിൽ ഉൾപ്പെടെ പ്രതിഷേധിച്ചിരുന്നു.

അതേസമയം, നേരത്തെ റദ്ദാക്കിയ യു.ജി.സി-നെറ്റ് പരീക്ഷ ജൂലൈ 25 മുതല്‍ 27 വരെ നടക്കും. ക്രമക്കേട് നടന്നെന്ന് കണ്ടെത്തിയതിനു പിന്നാലെ പരീക്ഷ കഴിഞ്ഞ് രണ്ട് ദിവസത്തിന് ശേഷമാണ് നെറ്റ് പരീക്ഷ രാജ്യത്ത് റദ്ദാക്കിയത്.