തിരുവനന്തപുരം: ബാര്‍കോഴ കേസില്‍ കെ.എം മാണിക്കെതിരേയുള്ള തുടരന്വേഷണത്തിനുള്ള വിജിലന്‍സ് കോടതി ഉത്തരവും യു.ഡി.എഫിലെ ചിലരെ വിജിലന്‍സ് നോട്ടമിട്ടതും കോണ്‍ഗ്രസിനെ പ്രതിരോധത്തിലാക്കി. മാണിക്കുപുറമേ ഉമ്മന്‍ചാണ്ടിക്കും മുന്‍ എക്‌സൈസ് മന്ത്രി കെ ബാബു അടക്കമുള്ള കോണ്‍ഗ്രസ് നേതാക്കളിലേയ്ക്കും അന്വേഷണം വ്യാപിക്കുമെന്ന ആശങ്കയാണ് പാര്‍ട്ടിയെ വെട്ടിലാക്കുന്നത്.
യു.ഡി.എഫ് സര്‍ക്കാര്‍ അധികാര ദുര്‍വിനിയോഗം നടത്തി ബാര്‍കോഴ കേസിലെ അന്വേഷണ റിപ്പോര്‍ട്ട് അട്ടിമറിച്ചെന്നാണ് അന്നത്തെ പ്രതിപക്ഷത്തിന്റെ മുഖ്യആരോപണം.

അന്വേഷണ ഉദ്യോഗസ്ഥനായിരുന്ന ആര്‍ സുകേശന്‍ കഴിഞ്ഞദിവസം കോടതിയില്‍ ഉന്നയിച്ച കാര്യങ്ങള്‍ എല്‍.ഡി.എഫിന്റെ ആരോപണങ്ങളെ ശരിവയ്ക്കുന്നതാണ്. വീണ്ടും മൊഴിയെടുക്കുമ്പോള്‍ യു.ഡി.എഫ് സര്‍ക്കാരിന് അനുകൂലമായ നിലപാടെടുത്ത ഒരുവിഭാഗം ബാറുടമകള്‍ പഴയ നിലപാടു മാറ്റിപ്പറഞ്ഞാല്‍ അന്വേഷണം വഴിമാറും. എന്നാല്‍ വ്യത്യസ്തമായ റിപ്പോര്‍ട്ടുകള്‍ നല്‍കിയ അന്വേഷണ ഉദ്യോഗസ്ഥനായിരുന്ന സുകേശന്റെ വിശ്വാസ്യതയെ ചോദ്യംചെയ്താവും ബാര്‍ കോഴകേസിനെ യു.ഡി.എഫ് പ്രതിരോധിക്കുക.

സുപ്രധാനമായ ബാര്‍കോഴ കേസ് അന്വേഷിച്ച ഒരു ഉദ്യോഗസ്ഥന്‍ തന്നെ കേസ് അട്ടിമറിച്ചെന്നാരോപിച്ചു വിജിലന്‍സ് കോടതിയെ സമീപിച്ചത് സി.പി.എം നേതൃത്വത്തിന്റെ അറിവോടെ തന്നെയാണെന്നാണ് യു.ഡി.എഫ് കരുതുന്നത്. മാണിക്കെതിരേ സി.പി.എം പ്രതികാരരാഷ്ട്രീയം കളിക്കുന്നുവെന്ന കെ.പി.സി.സി പ്രസിഡന്റ് വി.എം സുധീരന്റെ പരാമര്‍ശത്തിന്റെ കാരണവും ഇതാണ്.
യു.ഡി.എഫിന്റെ ഭരണകാലത്തു മാണിയെ ഉപയോഗിച്ച് സര്‍ക്കാരിനെ അട്ടിമറിക്കാന്‍ സി.പി.എം നീക്കം നടത്തിയിരുന്നതായി പി.സി ജോര്‍ജ് എം.എല്‍.എ ഉള്‍പ്പെടെ പലരും വെളിപ്പെടുത്തിയിരുന്നു.

ഇതേ അവസരത്തിലാണ് ബാര്‍കോഴ വിവാദം തലപൊക്കിയത്. യു.ഡി.എഫില്‍ നിന്നു പുറത്തുവന്ന മാണി എന്‍.ഡി.എയില്‍ ചേരുന്നുവെന്ന അഭിപ്രായം ഉയര്‍ന്നതോടെയാണു മാണിക്കുമേല്‍ വീണ്ടും കുരുക്കുവീണത്.