കോഴിക്കോട്: ഏമാൻമാരുടെ തെറ്റുകളും കുറ്റങ്ങളുമെല്ലാം മുഖം നോക്കാതെ പൊലിസുകാർക്ക് ഇനി തുറന്നു പറയാം. മേലുദ്യോഗസ്ഥരുടെ ഭാഗത്തു നിന്നുള്ള മാനസിക പീഡനം മുതൽ വ്യക്തിപരമായ പ്രശ്‌നങ്ങൾ വരെ പൊലിസുകാരെ അസ്വസ്ഥമാക്കുന്ന വിഷയങ്ങൾ അവതരിപ്പിക്കാനാണ് ഗൂഗിൾ ഫോം തയാറാക്കിയിട്ടുള്ളത്.

പരാതികളും പ്രശ്‌നങ്ങളും രേഖാമൂലം എഴുതി നേരിട്ട് സമർപ്പിക്കുന്നതിന്റെ ബുദ്ധിമുട്ടുകൾ ഒഴിവാക്കാൻ പ്രത്യേക ഗൂഗിൾ ഫോം സഹായകമാകും. പൊലിസുകാരുടെ പരാതികൾ കേൾക്കാൻ മേലധികാരികൾ തയാറാവാത്തത് സംബന്ധിച്ച് ചർച്ചകൾ നടക്കുന്ന സാഹചര്യത്തിലാണ് ഗൂഗിൾ ഫോം വഴി ആവലാതികൾ അയക്കാൻ കോഴിക്കോട് സിറ്റി പൊലിസ് കമ്മിഷണർ സൗകര്യമൊരുക്കിയത്.

പൊലിസ് സേനാംഗങ്ങൾക്ക് ഏതെങ്കിലും തരത്തിലുള്ള ആവലാതികളുണ്ടെങ്കിൽ ഗൂഗിൾഫോം അയച്ചുതരാമെന്ന് കമ്മിഷണർ പുറത്തിറക്കിയ സർക്കുലറിലുണ്ട്. പരാതി ഫോമിൽ ഡ്യൂട്ടിയിൽ നിങ്ങൾക്ക് എന്തെങ്കിലും പ്രശ്‌നങ്ങളുണ്ടോയെന്നാണ് ചോദിക്കുന്നത്. പേര്, തസ്തിക, ജോലി ചെയ്യുന്ന യൂനിറ്റ്, മൊബൈൽ നമ്പർ, ഇ-മെയിൽ എന്നീ വിവരങ്ങളും നിങ്ങൾക്ക് എന്തു സഹായമാണ് ആവശ്യമെന്നുമാണ് ചോദിക്കുന്നത്.

കഴിഞ്ഞ ദിവസമാണ് ഇതു സംബന്ധിച്ചുള്ള സർക്കുലർ പുറത്തിറക്കിയത്. അതേസമയം, ഗൂഗിൾഫോമിൽ കമ്മിഷണർ മുമ്പാകെ മറ്റു പൊലിസുദ്യോഗസ്ഥരുടെ തെറ്റുകളും മറ്റും രേഖാമൂലം ചൂണ്ടിക്കാട്ടുന്നതിൽ പൊലിസുകാർക്കിടയിൽ ആശങ്കകളുണ്ട്. പരാതി നൽകിയതിന്റെ പേരിൽ കൂടുതൽ പ്രശ്‌നങ്ങൾ ഉടലെടുക്കുമോയെന്ന ആശങ്കയാണ് പൊലിസുകാർക്കുള്ളത്.

ജോലി സ്ഥലത്തെ അടിസ്ഥാന സൗകര്യങ്ങൾ സംബന്ധിച്ചു പോലും ഭയം കാരണം പരാതി അറിയിക്കാൻ സാധിക്കാത്തവർ ഇപ്പോഴുമുണ്ട്. അതേസമയം, നിരവധി പേർ ഇതിനെ സ്വാഗതം ചെയ്യുകയും പരാതികൾ അയക്കാൻ തയാറാവുകയും ചെയ്തതായാണ് വിവരം. പൊലിസുകാരുടെ പ്രശ്‌നങ്ങൾ സംബന്ധിച്ചുള്ള വിവരങ്ങൾ ശേഖരിക്കാൻ ഡി.ജി.പിയുടെ നിർദേശമുണ്ട്. തുടർന്നാണ് ഗൂഗിൾ ഫോം ഉപയോഗപ്പെടുത്താൻ കമ്മിഷണർ തീരുമാനിച്ചത്.

പൊലിസ് ഉദ്യോഗസ്ഥരുടെ സർവിസ് സംബന്ധമായും വ്യക്തിപരമായുമുള്ള പരാതികൾ പരിഹാരിക്കാൻ നേരത്തെ സഭ ചേർന്നിരുന്നു. പിന്നീട് ഇതെല്ലാം നിലച്ചു. പൊലിസുകാർക്കിടയിലെ മാനസിക സമ്മർദം കണക്കിലെടുത്ത് മുൻ ഡി.ജി.പി അനിൽകാന്ത് സഭ ചേരണമെന്ന് ജില്ലാ പൊലിസ് മേധാവിമാർക്കും നിർദേശം നൽകിയിരുന്നു. എന്നാൽ, ഈ ഉത്തരവ് മുക്കി. പൊലിസ് ഓഫിസേഴ്‌സ് അസോസിയേഷൻ കോഴിക്കോട് സിറ്റി സമ്മേളനത്തിൽ ഉത്തരമേഖലാ ഐ.ജി കെ. സേതുരാമനും പൊലിസുകാർക്ക് പരാതി പറയാൻ ഇടമില്ലെന്ന് പരസ്യമായി വെളിപ്പെടുത്തിയിരുന്നു. തുടർന്നാണ് സഭയ്ക്ക് പകരം ഗൂഗിൾ ഫ്ളാറ്റ്ഫോമിൽ പരാതി പറയാൻ പൊലിസുകാർക്ക് സൗകര്യമൊരുക്കിയത്.

Police can now handle complaints and mental distress affecting professionals and personal issues, by opening the face without looking: Google Form for Police Reporting Without Revealing Identity