കോഴിക്കോട്: മലയാളി ലോറി ഡ്രൈവർ അർജുനെ മണ്ണിടിഞ്ഞ് കാണാതായ ഉത്തരകന്നഡയിലെ ഷിരൂർ കുന്നിന്റെ ഉപഗ്രഹ ദൃശ്യങ്ങൾ ഐഎസ്ആർഒയുടെ കൈവശമില്ല. മണ്ണിടിച്ചിൽ സംഭവിച്ച സമയത്ത് ഇന്ത്യൻ ഉപഗ്രഹങ്ങൾക്ക് ഷിരൂർ കുന്നിൽ നിന്ന് ദൃശ്യങ്ങൾ പകർത്തിയിട്ടില്ലെന്നാണ് കണ്ടെത്തൽ. അപകടം നടക്കുന്നതിന് രണ്ടു മണിക്കൂർ മുൻപും അതിനുശേഷം വൈകിട്ട് 6നുമാണ് ഈ പ്രദേശത്തെ ദൃശ്യങ്ങൾ ഉപഗ്രഹങ്ങളിൽ ഉള്ളത്.

ഉപഗ്രഹങ്ങൾ സദാസമയം കറങ്ങിക്കൊണ്ട് ഒരിടത്തു നിന്ന് മറ്റൊരിടത്തേക്ക് സഞ്ചരിച്ചാണ് സാധാരണ ദൃശ്യങ്ങൾ പകർത്തുന്നത്. അതിനാൽ ഒരേ സ്ഥലത്തെ തുടർച്ചയായ ദൃശ്യങ്ങൾ ലഭിക്കില്ല. അതിനാലാണ് സംഭവ സമയത്തെ ദൃശ്യങ്ങൾ ലഭിക്കാതെ പോയത്. അതിനു മുൻപും ശേഷവുമുള്ളത് പകർത്തിയിട്ടുണ്ട് താനും. അപകട സ്ഥലത്തിന്റെ വിവിധ ദൃശ്യങ്ങൾ ഐഎസ്ആർഒ കൈമാറിയിരുന്നു.

കർണാടകയിൽ ഐസ്ആർഒയ്ക്കു വേണ്ടി ഇക്കാര്യങ്ങൾ നടത്തുന്ന നോഡൽ ഏജൻസിയാണ് കർണാടക സ്റ്റേറ്റ് റിമോട്ട് സെൻസറിങ് ആപ്ലിക്കേഷൻ സെന്റർ. ഇവിടെ നടത്തിയ പരിശോധനയിൽ നിന്നാണ് സംഭവ സമയത്തെ ദൃശ്യങ്ങൾ പകർത്തിയിട്ടില്ല എന്ന് കണ്ടെത്തിയത്. കോൺഗ്രസ് ദേശീയ ജനറൽ സെക്രട്ടറിയും എം.പിയുമായ കെ.സി.വേണുഗോപാലാണ് സാറ്റ്‌ലൈറ്റ് ദൃശ്യങ്ങൾ ശേഖരിക്കാൻ ഐഎസ്ആർഒയിൽ‌ ഇടപെടൽ നടത്തിയത്. അർജുനായുള്ള തിരച്ചിലിൽ ഇത് ഉപകരിക്കുമെന്ന് കണ്ടായിരുന്നു അദ്ദേഹത്തിന്റെ ഇടപെടൽ.

അതേസമയം, അപകടം നടക്കുന്ന സമയത്ത് അവിടത്തെ ദൃശ്യങ്ങൾ ലഭ്യമാക്കാനുള്ള ശ്രമങ്ങൾ നടക്കുന്നുണ്ട്. ഇന്ത്യൻ ഉപഗ്രഹത്തിൽ ഇല്ലെങ്കിലും മറ്റു രാജ്യങ്ങളുടെ ഉപഗ്രഹങ്ങൾ സാറ്റ്‌ലൈറ്റ് ദൃശ്യങ്ങൾ പകർത്തിയിട്ടുണ്ടോ എന്ന് പരിശോധിച്ച് വരികയാണ്. ഏതെങ്കിലും രാജ്യത്തിന്റെ ഉപഗ്രഹം ഇവിടുത്തെ ദൃശ്യങ്ങൾ പകർത്തിയിട്ടുണ്ടെങ്കിൽ അവ ലഭ്യമാക്കാനാണ് ശ്രമം.