ന്യൂഡല്‍ഹി: ബജറ്റിന് ഒരു ദിവസം മുന്‍പ് ധനമന്ത്രി സാമ്പത്തിക സര്‍വേ ലോക്‌സഭയില്‍ അവതരിപ്പിച്ച് നിര്‍മല സീതാരാമന്‍. ഇന്ത്യയുടെ മുഖ്യ സാമ്പത്തിക ഉപദേഷ്ടാവിന്റെ (സിഇഎ) മാര്‍ഗനിര്‍ദേശപ്രകാരം ധനമന്ത്രാലയത്തിലെ സാമ്പത്തിക കാര്യ വകുപ്പിലെ സാമ്പത്തിക വിഭാഗം തയ്യാറാക്കുന്നതാണ് ഇത്. പ്രധാനമായു സാമ്പത്തിക സര്‍വ്വേയില്‍ രാജ്യത്തിന്റെ ജിഡിപി വളര്‍ച്ച 6.5 മുതല്‍ 7 ശതമാനം വരെയാണ് കണക്കാക്കിയിരിക്കുന്നത്. 

അതേസമയം രാജ്യത്ത് ഭക്ഷ്യോല്‍പന്ന വിലനിലവാരം (ഫുഡ് ഇന്‍ഫ്‌ലേഷന്‍) കഴിഞ്ഞ രണ്ടുവര്‍ഷത്തിനിടെ ഇരട്ടിയായെന്നും സര്‍വേ വ്യക്തമാക്കുന്നു. 2021-22ലെ 3.8 ശതമാനത്തില്‍നിന്ന് 7.5 ശതമാനത്തിലേക്കാണ് കഴിഞ്ഞവര്‍ഷത്തെ വളര്‍ച്ച. കാലാവസ്ഥാ വ്യതിയാനം, ഉഷ്ണതരംഗം, കാലം തെറ്റിപ്പെയ്ത മഴ, മോശം മണ്‍സൂണ്‍, വരള്‍ച്ച എന്നിവ കാര്‍ഷികോല്‍പാദനത്തെ ബാധിച്ചതാണ് ഇതിന് കാരണമെന്നും റിപ്പോര്‍ട്ടിലുണ്ട്. അതേസമയം, ചില്ലറ വിലക്കയറ്റത്തോത് (റീറ്റെയ്ല്‍ ഇന്‍ഫ്‌ളേഷന്‍) 2022-23ലെ 6.7ല്‍ നിന്ന് 202324ല്‍ 5.4 ശതമാനത്തിലേക്ക് കുറഞ്ഞത് നേട്ടമാണെന്നും റിപ്പോര്‍ട്ട് പറയുന്നു.

കൂടാതെ രാജ്യത്ത് മൊത്തം വരുമാനത്തിന്റെ 67 ശതമാനവും നേടുന്നത് ജനസംഖ്യയിലെ ഉയര്‍ന്ന സാമ്പത്തികശേഷിയുള്ള ആദ്യ 67 ശതമാനം പേരാണെന്നും വരുമാനത്തിന്റെ മൂന്നിലൊന്നും നേടുന്നത് ആദ്യ 10 ശതമാനം പേരാണെന്നും സര്‍വേ ചൂണ്ടിക്കാട്ടുന്നു. രാജ്യത്തെ ജനസംഖ്യയില്‍ രണ്ടിലൊന്ന് പേരും തൊഴില്‍ വൈദഗ്ധ്യമുള്ളവരല്ല. നിര്‍മാണ (കണ്‍സ്ട്രക്ഷന്‍) മേഖലയാണ് തൊഴിലവസരങ്ങളില്‍ കൂടുതല്‍ വളര്‍ച്ച നേടുന്നത്. കുറഞ്ഞ വേതനവും കുറഞ്ഞ വൈദഗ്ധ്യവുമുള്ളവരെ കൂടുതലായി ലഭിക്കുന്നു എന്നതാണ് ഇതിന് കാരണം. ഇന്ത്യയുടെ ധനക്കമ്മി 202526ല്‍ ജിഡിപിയുടെ 4.6 ശതമാനത്തിലേക്ക് താഴുമെന്നും സര്‍വേ പറയുന്നു.