ബെംഗളൂരു: അര്‍ജുന് വേണ്ടിയുള്ള ഇന്നത്തെ തിരച്ചില്‍ അവസാനിപ്പിച്ചു. അര്‍ജുന്റെ ലോറി ഗംഗാവലി നദിയില്‍ കണ്ടെത്തിയ സാഹചര്യത്തില്‍ നാവിക സേനയുടെ സംഘം സ്ഥലത്തേക്ക് തിരിച്ചെങ്കിലും കനത്ത മഴയെ തുടര്‍ന്ന് ദൗത്യം തല്‍ക്കാലത്തേക്ക് നിര്‍ത്തുകയായിരുന്നു. ദൗത്യം നാളെയോടെ പൂര്‍ണത്തിയാകുമെന്ന് എം.എല്‍.എ സതീഷ് കൃഷ്ണ മാധ്യമങ്ങളോട് പറഞ്ഞു. 

ഗംഗാവലി നദിയിലേക്ക് തല കീഴായാണ് ലോറി കിടക്കുന്നതെന്നാണ് വിവരം. കരയില്‍ നിന്നും 20 മീറ്റര്‍ അകലെയാണ് ട്രക്കുള്ളത്. ലോറി ഉയര്‍ത്തുന്നതിന് കൃത്യമായ ആക്ഷന്‍ പ്ലാന്‍ നാവിക സേനയും, കരസേനയും തയ്യാറാക്കിയിട്ടുണ്ട്. ട്രക്കിനായി മുങ്ങല്‍ വിദഗ്ദര്‍ പരിശോധന നടത്തും. അതിന് ശേഷമായിരിക്കും ട്രക്ക് പുറത്തെടുക്കുക. ഡ്രോണ്‍ ഉള്‍പ്പെടെയുള്ള കൂടുതല്‍ ഉപകരണങ്ങള്‍ നാളെ എത്തും. കുത്തൊഴുക്കുള്ള പുഴയില്‍ ലോറി ഉറപ്പിച്ച് നിര്‍ത്തും. തുടര്‍ന്ന് ലോറി ലോക്ക് ചെയ്ത ശേഷം ക്രെയിന്‍ ഉപയോഗിച്ച് ഉയര്‍ത്തും.

ലോറി കണ്ടെത്തുന്നതിനായി ഇന്ന് നാവികസേനയുടെ സംഘം നദിയിലേക്ക് പോയെങ്കിലും തിരച്ചില്‍ നടത്താന്‍ കഴിയാതെ വന്നതോടെ മടങ്ങുകയായിരുന്നു. മൂന്ന് ബോട്ടുകളിലായി 18 പേരാണ് ആദ്യം ലോറിക്കരികിലേക്ക് പോയത്. ഇന്ന് രാത്രി 11 മണി വരെ ദൗത്യം തുടരുമെന്നായിരുന്നു ആദ്യം അറിയിച്ചത്. എന്നാല്‍ കനത്ത മഴയും, കാറ്റും തുടര്‍ന്നതോടെ രക്ഷാപ്രവര്‍ത്തനം തടസ്സപ്പെട്ടു. ഗംഗാവലയില്‍ ജലനിരപ്പ് കുത്തനെ ഉയരുകയും ചെയതിട്ടുണ്ട്. 

Heavy rain, halts today's search MLA said that the mission will be completed tomorrow