ബംഗളൂരു: ബംഗളൂരുവിലെ ഹോട്ടലുകളില്‍ വിതരണം ചെയ്യാനായി മുസ്‌ലിം വ്യാപാരി പട്ടിയിറച്ചി കൊണ്ടു വന്നുവെന്ന ഹിന്ദുത്വര്‍ നടത്തിയ പ്രചാരണം പൊളിഞ്ഞു.  ഇറഫച്ചി ആടിന്റേതാണെന്ന് ഭക്ഷ്യസുരക്ഷാ ഉദ്യോഗസ്ഥര്‍ സ്ഥിരീകരിച്ചു. ബംഗളൂരുവിലെ ഹോട്ടലുകളില്‍ വിതരണം ചെയ്യാനായി  2,700 കിലോ ഇറച്ചിയാണ് ജയ്പുരില്‍ നിന്നെത്തിച്ചിരുന്നത്. അബ്ദുല്‍ റസാഖ് എന്ന മാംസ വ്യാപാരിയുടെ പേരിലാണ് പാഴ്‌സല്‍ എത്തിയത്. 

പിന്നാലെ ആട്ടിറച്ചിയെന്ന വ്യാജേന 90 പാക്കറ്റുകളിലായി കൊണ്ടുവന്നത് പട്ടിയിറച്ചിയാണെന്ന് ഹിന്ദുത്വവാദികള്‍ പ്രചരിപ്പിച്ചു. കര്‍ണാടക ബി.ജെ.പിയുടെ ഔദ്യേഗിക എക്‌സ് പേജിലൂടെയടക്കം സമൂഹമാധ്യമങ്ങളില്‍ വിദ്വേഷ പ്രചാരണം വ്യാപകമാവുകയും ചെയ്തിരുന്നു. ഇക്കാര്യം പറഞ്ഞ് ഇവര്‍  പ്രതിഷേധിക്കുകയും ചെയ്തു. ഗോരക്ഷാ ഗുണ്ടയും കൊലക്കേസ് പ്രതിയുമായ പുനീത് കേരെഹള്ളിയുടെ നേതൃത്വത്തില്‍ ഒരു സംഘം ഹിന്ദുത്വവാദികള്‍ മാംസം പട്ടിയിറച്ചിയാണെന്ന് ആരോപിച്ച് റെയില്‍വേ സ്റ്റേഷനിലും പ്രതിഷേധിച്ചു. ഹിന്ദുത്വവാദികള്‍ പ്രതിഷേധവുമായി രംഗത്തുവന്നതോടെ റെയില്‍വേ സ്റ്റേഷനില്‍ എത്തിയ ഭക്ഷ്യസുരക്ഷാ ഉദ്യോഗസ്ഥര്‍ മാംസം പിടിച്ചെടുക്കുകയായിരുന്നു. ഇത് പിന്നീട് പരിശോധനക്കയച്ചപ്പോഴാണ് ആട്ടിറച്ചി തന്നെയാണെന്ന് തെളിഞ്ഞത്.

രാജസ്ഥാനില്‍ നിന്നുള്ള സിരോഹി ഇനത്തില്‍പെട്ട ആടിന്റെ ഇറച്ചിയാണ് എത്തിച്ചതെന്ന് ഫുഡ് സേഫ്റ്റി കമ്മിഷണര്‍ കെ. ശ്രീനിവാസ് പറഞ്ഞു. 

അതേസമയം, ഉദ്യോഗസ്ഥരുടെ കൃത്യനിര്‍വഹണം തടസപ്പെടുത്തിയതിന് പുനീത് കേരെഹള്ളിയെയും കൂട്ടാളികളെയും കോട്ടന്‍പേട്ട് പൊലിസ് അറസ്റ്റ് ചെയ്തു.