എടച്ചേരി: വിദ്യാര്‍ഥികള്‍ക്ക് ആവേശമായി ദ്രോണാചാര്യ അവാര്‍ഡ് ജേതാവ് ഒ.എം നമ്പ്യാര്‍ എടച്ചേരി പുതിയങ്ങാടിയിലെ നരിക്കുന്ന് യു.പി സ്‌കൂളിലെത്തി. ലോക കായിക ദിനത്തോടനുബന്ധിച്ച് ഏര്‍പ്പെടുത്തിയ ചടങ്ങ് ഉദ്ഘാടനം ചെയ്യാനാണ് നമ്പ്യാര്‍ സ്‌കൂളിലെത്തിയത്.
ഏറെനേരം കുട്ടികളുമായി സംവദിച്ച നമ്പ്യാര്‍ അവരുടെ ചോദ്യങ്ങള്‍ക്കെല്ലാം മറുപടിയും നല്‍കിയാണു മടങ്ങിയത്. പ്രൈമറിതലം മുതല്‍ തന്നെ കായിക രംഗത്തു നല്ല പരിശീലനം കുട്ടികള്‍ക്കു നല്‍കേണ്ടതുണ്ടെന്ന് പുറമേരി കടത്തനാട് രാജാസ് ഹൈസ്‌കൂളില്‍ വിദ്യാര്‍ഥിയായിരിക്കുമ്പോള്‍ തനിക്കുണ്ടായ കായിക അനുഭവങ്ങള്‍ പങ്കുവച്ചു നമ്പ്യാര്‍ അഭിപ്രായപ്പെട്ടു. സ്‌കൂളിലെ കുട്ടികള്‍ക്കു കായിക പരിശീലനത്തിനാവശ്യമായ എല്ലാ പിന്തുണയും അദ്ദേഹം വാഗ്ദാനം ചെയ്തു.
സ്‌കൂളില്‍ പുതുതായി ആരംഭിച്ച കായിക ക്ലബ് നമ്പ്യാര്‍ ഉദ്ഘാടനം ചെയ്തു. പി.ടി.എ പ്രസിഡന്റ് അനില്‍കുമാര്‍ അധ്യക്ഷനായി. പ്രധാനാധ്യാപിക സുമ വി.പി, രാജീവ് വള്ളില്‍, നാരായണന്‍ പനയുള്ളതില്‍, ശ്രീധരന്‍, കമല സംസാരിച്ചു.