തിരുവനന്തപുരം: ഉരുള്‍പൊട്ടലില്‍ തകര്‍ന്ന മുണ്ടക്കൈയിലെ ജനങ്ങളുടെ പുനരധിവാസത്തിനായി മുസ് ലിം ലീഗ് നടത്തുന്ന ധനസമാഹണത്തെ പ്രശംസിച്ച് നടനും സംവിധായകനുമായ ജോയ് മാത്യു. സുതാര്യത അതാണ് നമുക്ക് വേണ്ടത്. കണക്കിലായാലും കാര്യത്തിലായാലും- ജോയ് മാത്യു ഫേസ്ബുക്കില്‍ കുറിച്ചു. 

നല്‍കുന്നവനും അതില്‍ നിന്ന് സ്വീകരിക്കുന്നവനും അതിന്റെ സുതാര്യത ഉറപ്പ് വരുത്തണം. ഇന്നത്തെ കാലത്ത് ഡിജിറ്റലായി കാര്യങ്ങള്‍ ചെയ്യാമെന്നിരിക്കെ മുസ് ലിം ലീഗ് അത് നല്ല രീതിയില്‍ തന്നെ പ്രാവര്‍ത്തികമാക്കി തങ്ങള്‍ കാലത്തിനൊപ്പമാണെന്ന തെളിയിച്ചുവെന്നും അദ്ദേഹം പറഞ്ഞു. 

മുസ് ലിം ലീഗ് സംസ്ഥാന അധ്യക്ഷന്‍ സാദിഖലി ശിഹാബ് തങ്ങളും പി.കെ കുഞ്ഞാലിക്കുട്ടിയും ചേര്‍ന്ന് കഴിഞ്ഞ വെളളിയാഴ്ച്ചയാണ് ഫോര്‍ വയനാട് എന്ന പേരില്‍ ആപ്പ് പുറത്തിറക്കിയത്. ഒടുവിലെ കണക്ക് പ്രകാരം അഞ്ച് കോടി പിന്നിട്ടുകഴിഞ്ഞു. ഓഗസ്റ്റ് 15 വരെയാണ് ധനസമാഹരണം നടത്തുന്നത്.

ജോയ് മാത്യുവിന്റെ ഫേസ്ബുക്ക് കുറിപ്പിന്റെ പൂര്‍ണരൂപം: 

ദുരിതര്‍ക്ക് ആശ്വാസം നല്‍കാനായിരിക്കണം ദുരിതാശ്വാസ ഫണ്ടുകള്‍ .
അതിലേക്ക് നല്‍കുന്നവനും അതില്‍ നിന്ന് സ്വീകരിക്കുന്നവനും അതിന്റെ സുതാര്യത ഉറപ്പ് വരുത്തണം .ഇന്നത്തെ കാലത്ത് ഡിജിറ്റലായി കാര്യങ്ങള്‍ ചെയ്യാമെന്നിരിക്കെ മുസ്ലിം ലീഗ് അത് നല്ല രീതിയില്‍ത്തന്നെ പ്രാവര്‍ത്തികമാക്കി തങ്ങള്‍ കാലത്തിനൊപ്പമാണെന്ന് തെളിയിച്ചു .
for wayanad എന്ന ആപ്പിലൂടെയുള്ള ദുരിതാശ്വാസ നിധി സമാഹരണം സുതാര്യമായി എനിക്ക് തോന്നി .യൂട്യൂബര്‍ രാജന്‍ ജോസഫിന്റെ ഒരു വീഡിയോയില്‍ നിന്നാണ് ഞാനിതറിഞ്ഞത് .
സുതാര്യത ,അതാണ് നമുക്ക് വേണ്ടത് ;കണക്കിലായാലും കാര്യത്തിലായാലും !
അതിനാല്‍ ഈ ആപ്പ് വഴി ഞാനും ഒരു അണ്ണാറക്കണ്ണനാകട്ടെ.
താഴെക്കൊടുത്തിരിക്കുന്നതാണ് ആപ്പ്