തിരുവനന്തപുരം: തിരുവനന്തപുരത്ത് അഞ്ചുപേർക്ക് ഇതുവരെ അമീബിക് മസ്തിഷ്ക ജ്വരം സ്ഥിരീകരിച്ചു. ഇതിനു പുറമെ രണ്ട് പേർ രോഗലക്ഷണങ്ങളോടെ നിരീക്ഷണത്തിൽ ഉണ്ട്. ഇവരുടെ സാമ്പിൾ പരിശോധനയ്ക്ക് അയച്ചിട്ടുണ്ട്. ഇതിന്റെ ഫലങ്ങൾ ഇന്ന് കിട്ടിയേക്കും.

അഞ്ചുപേർക്ക് രോഗം സ്ഥിരീകരിച്ചതിൽ ഒരാൾ നേരത്തെ മരിച്ചിരുന്നു. നെല്ലിമൂട് സ്വദേശിയാണ് മരിച്ചത്. ജൂലൈ 23-ാം തീയതി മെഡിക്കൽ കോളേജ് ആശുപത്രിയിൽ ചികിത്സയിലിരിക്കെയാണ് മരണം. നാല് പേരാണ് നിലവിൽ മെഡിക്കൽ കോളേജ് ആശുപത്രിയിൽ ചികിത്സയിയിലുള്ളത്. നെല്ലിമൂട് സ്വദേശികളായ മൂന്ന് യുവാക്കൾ, പേരൂർക്കട സ്വദേശിയായ ഒരാൾ എന്നിവരാണ് ചികിത്സയിലുള്ളത്.

കാവിൻകുളത്തിൽ നിന്നാണ് നെല്ലിമൂട് സ്വദേശികൾക്ക് രോഗം ബാധിച്ചത് എന്നാണ് ആരോഗ്യ വകുപ്പിന്റെ നിഗമനം. എന്നാൽ പേരൂർക്കട സ്വദേശിക്ക് രോഗം പിടിപ്പെട്ടതിന്റെ  ഉറവിടം വ്യക്തതയായിട്ടില്ല. ഇതിനെല്ലാം പുറമെ നെയ്യാറ്റിൻകര നെല്ലിമൂടിൽ 39 പേർ നിരീക്ഷണത്തിൽ ഉള്ളതായി ആരോഗ്യവകുപ്പ് അറിയിച്ചിട്ടുണ്ട്.