കണ്ണൂര്‍: കെ.എസ്.യു പ്രവര്‍ത്തകര്‍ ഡി.ഡി.ഇ ഓഫിസില്‍ നടത്തിയ ഉപരോധത്തില്‍ സംഘര്‍ഷം. പാഠപുസ്തകവും യൂനിഫോമും വിതരണം ചെയ്യാത്തതില്‍ പ്രതിഷേധിച്ചാണു ഇന്നലെ രാവിലെ ഒന്‍പതോടെ ജില്ലാ വിദ്യാഭ്യാസ ഓഫിസറെ ഉപരോധിച്ചത്. ഡി.ഡി.ഇയുടെ ചുമതലയുള്ള സി.പി പദ്മരാജന്റെ മുറിക്കകത്തേക്ക് ഇരച്ചുകയറാന്‍ ശ്രമിച്ച പ്രവര്‍ത്തകരും പൊലിസും തമ്മില്‍ ഉന്തുംതള്ളുമുണ്ടായി.അറുപതോളം കെ.എസ്.യു പ്രവര്‍ത്തകരാണ് ഉപരോധനത്തിനെത്തിയത്. പ്രവര്‍ത്തകരെ അറസ്റ്റുചെയ്ത് ജീപ്പില്‍ കയറ്റുന്നതിനിടെ പിടിവലിയില്‍ ചിലര്‍ നിലത്ത് വീഴുകയും ചെയ്തു. സുധീപ് ജയിംസ്, വി.പി അബ്ദുല്‍റഷീദ്, വി രാഹുല്‍, ഷമ്മാസ്, ആദര്‍ശ് മാങ്ങാട്ടിടം, നൗഫല്‍ എന്നിവര്‍ ഉപരോധത്തിനു നേതൃത്വം നല്‍കി.