ന്യൂഡല്‍ഹി: ഹിന്‍ഡന്‍ബര്‍ഗ് റിസര്‍ച്ചിന്റെ പുതിയ റിപ്പോര്‍ട്ടില്‍ അന്വേഷണം ആവശ്യപ്പെട്ട് സുപ്രിംകോടതിയില്‍ ഹരജിയുമായി അഭിഭാഷകനായ വിശാല്‍ തിവാരി.  സെബി ചെയര്‍പേഴ്‌സണ്‍ മാധബി ബുച്ചിനെതിരായ വെളിപ്പെടുത്തലില്‍ അന്വേഷണം വേണമെന്നാണ് ഹരജിയില്‍ ആവശ്യപ്പെടുന്നത്.

സെബി ചെയര്‍പേഴ്‌സണ്‍ മാധബി പുരി ബൂച്ചിനും ഭര്‍ത്താവിനും മൗറീഷ്യസിലും ബെര്‍മുഡയിലുമുള്ള അദാനി ഗ്രൂപ്പ് പുറന്തോട് കമ്പനികളില്‍ നിക്ഷേപമുണ്ടെന്നായിരുന്നു ഹിന്‍ഡന്‍ബര്‍ഗ് പുതിയ റിപ്പോര്‍ട്ട്. അദാനി ഗ്രൂപ്പിന്റെ ഓഹരി തട്ടിപ്പില്‍ അന്വേഷണം പുരോഗമിക്കുമ്പോഴാണ് ഷെല്‍ കമ്പനികളില്‍ മാധവിക്കും ഭര്‍ത്താവ് ധവാല്‍ ബുച്ചിനും ഉള്‍പ്പെടെ നിക്ഷേപമുള്ളതായി റിപ്പോര്‍ട്ട് പുറത്തു വന്നിരിക്കുന്നത്.  2015നാണു വിദേശ ഷെല്‍ കമ്പനികളില്‍ മാധബിയും ഭര്‍ത്താവ് ധവാലും നിക്ഷേപം തുടങ്ങിയത്. മാധവി സെബിയില്‍ ചേര്‍ന്ന 2017ല്‍ ദമ്പതിമാരുടെ സംയുക്ത അക്കൗണ്ട് ധവാലിന്റെ പേരിലേക്ക് മാറ്റാന്‍ മാധബി കമ്പനിക്ക് ഇമെയില്‍ അയച്ചിരുന്നതായും റിപ്പോര്‍ട്ടിലുണ്ടായിരുന്നു.

അതേസമയം, വെളിപ്പെടുത്തലില്‍ മാധബിക്ക് പിന്തുണയുമായി കേന്ദ്രം രംഗത്തെത്തിയിരുന്നു. വിഷയത്തില്‍ മാധബി ബൂച്ചും സെബിയും തങ്ങളുടെ ഭാഗം വിശദീകരിച്ചിട്ടുണ്ടെന്നും ഇക്കാര്യത്തില്‍ സര്‍ക്കാറിന് കൂടുതലൊന്നും കൂട്ടിച്ചേര്‍ക്കാനില്ലെന്നും ധനകാര്യ സെക്രട്ടറി അജയ് സേത്ത് വ്യക്തമാക്കി. വിഷയത്തില്‍ ആദ്യത്തെ ഔദ്യോഗിക പ്രതികരണമാണിത്. ചെയര്‍പേഴ്‌സണ്‍ തന്റെ പദവിയില്‍ നിന്ന് മാറി നില്‍ക്കുമോയെന്ന ചോദ്യത്തിന് സെബി താല്‍ക്കാലിക അംഗം കൂടിയായ സേത്ത് മറുപടി നല്‍കിയില്ല.