കണ്ണൂര്‍: തലശ്ശേരി പാനൂരില്‍ സിപിഎം പ്രവര്‍ത്തകനെ വെട്ടിക്കൊലപ്പെടുത്തിയ കേസില്‍ ആര്‍എസ്എസ് പ്രവര്‍ത്തകരുടെ ജീവപര്യന്തം ഹൈക്കോടതി ശരിവച്ചു. സിപിഎം പ്രവര്‍ത്തകനായ തഴയില്‍ അഷ്‌റഫിനെ കൊലപ്പെടുത്തിയ കേസിലെ പ്രതികള്‍ക്ക് തലശ്ശേരി സെഷന്‍സ് കോടതിയാണ് ജീവപര്യന്തം തടവും, 50,000 രൂപ പിഴയും ശിക്ഷ വിധിച്ചത്. ഇതാണ് ഹൈക്കോടതി ഡിവിഷന്‍ ബെഞ്ച് ശരിവെച്ചത്. 

ആര്‍എസ്എസ് ബിജെപി പ്രവര്‍ത്തകരായ മൊകേരി വള്ളങ്ങാട് പുതിയോത്ത് അനീഷ് എന്ന ഇരുമ്പന്‍ അനീഷ്, മൊകേരി വള്ളങ്ങാട് ഇപി രാജീവന്‍ എന്ന പൂച്ച രാജീവന്‍, തെക്കേ പാനൂരിലെ പിപി പുരുഷോത്തമന്‍, പാനൂര്‍ കുറ്റേരി സ്വദേശി സുബിന്‍ എന്ന ജിത്തു, തെക്കേ പാനൂരിലെ എന്‍കെ രാജേഷ് എന്ന രാജു, പാനൂര്‍, പന്ന്യന്നൂര്‍ ചമ്പാട് സ്വദേശി കെ രതീശന്‍ എന്നിവരാണ് കേസിലെ പ്രതികള്‍. 

2002 ഫെബ്രുവരി പതിനഞ്ചിനാണ് സിപിഎം പ്രവര്‍ത്തകനായ അഷ്‌റഫിനെ പാനൂര്‍ ബസ്റ്റാന്‍ഡിലെ കടയില്‍ വെച്ച് ആറംഗ സംഘം വെട്ടിക്കൊലപ്പെടുത്തിയത്. രാഷ്ട്രീയ വൈരാഗ്യമാണ് സുഹൃത്തുക്കള്‍ക്കൊപ്പം വാഹനം വാങ്ങാന്‍ എത്തിയ അഷ്‌റഫിന്റെ കൊലപാതകത്തിലേക്ക് നയിച്ചത്.

 The High Court has sentenced RSS workers to life imprisonment for the murder of a CPM activist in Panur, delivering a significant verdict in the case.