നിലവിൽ ലോക ഫുട്ബോളിൽ ഏറ്റവും മികച്ച യുവതാരങ്ങളിൽ ഒരാളാണ് സ്പാനിഷ് യുവതാരം ലാമിൻ യമാൽ. അർജന്റൈൻ ഇതിഹാസ താരമായ ലയണൽ മെസിയുമായി പല താരങ്ങളും പരിശീലകരും യമാലിനെ താരതമ്യം ചെയ്യുന്നുണ്ട്. ഇപ്പോൾ ലാമിൻ യമാലിനെക്കുറിച്ച് സംസാരിക്കുകയാണ് മുൻ ബാഴ്സലോണ താരം ഇമ്മാനുവൽ പെറ്റിറ്റ്. യമാലിന് മെസിയെക്കാൾ കൂടുതൽ ബാലൺ ഡി ഓർ അവാർഡുകൾ നേടാൻ സാധിക്കുമെന്നാണ് മുൻ ബാഴ്സ താരം പറഞ്ഞത്. 

''പ്ലേസ്റ്റേഷനിലെ കളിക്കാരെ പോലെ യമാൽ കളിക്കാരെ ഡ്രിബിൾ ചെയ്യുന്നു, ഡിഫൻഡർമാരെ കോൺ പോലെ തോന്നിപ്പിക്കുന്നു. അവന് വളരെ ഉയർന്ന നിലവാരമാണുള്ളത്. മെസിയെക്കാൾ മികച്ചവനാകാൻ അവന് കഴിയും. മെസി എട്ട് ബാലൺസ് ഡി ഓർ നേടി. എന്നാൽ യമാൽ ഇതിലേറെ ഇനിയും മുന്നോട്ട് പോവും. അവനെ കാണുന്നത് ഒരു സന്തോഷമാണ്'' എസ്കാപ്പിസ്റ്റ് മാഗസിനുമായുള്ള അഭിമുഖത്തിൽ ഇമ്മാനുവൽ പെറ്റിറ്റ് പറഞ്ഞു. 

ബാഴ്സലോണക്ക് വേണ്ടി ഇതിനോടകം തന്നെ തകർപ്പൻ പ്രകടനമാണ് യമാൽ പുറത്തെടുത്തുകൊണ്ടിരിക്കുന്നത്. ബാഴ്സയ്ക്ക് വേണ്ടി ഇതുവരെ 106 മത്സരങ്ങളിൽ നിന്നും 25 ഗോളുകളും 34 അസിസ്റ്റുകളും ആണ് നേടിയിട്ടുള്ളത്. 2023ൽ തന്റെ പതിനഞ്ചാം വയസ്സിലായിരുന്നു കറ്റാലൻമാർക്ക് വേണ്ടി യമാൽ ആദ്യമായി ബൂട്ട് കെട്ടിയത്. രാജ്യാന്തര തലത്തിൽ സ്പാനിഷ് ടീമിന് വേണ്ടിയും ശ്രദ്ധേയമായ പ്രകടനങ്ങൾ പുറത്തെടുക്കാൻ യമാലിന് സാധിച്ചിട്ടുണ്ട്. സ്പാനിഷ് ടീമിനൊപ്പം 2024 യൂറോ കപ്പ് സ്വന്തമാക്കാനും ലാമിന് സാധിച്ചിട്ടുണ്ട്.

Spanish youngster Lamine Yamal is currently one of the best young players in world football. The former Barcelona player says that Lamine Yamal can now win more Ballon d'Or awards than Lionel Messi.