മലപ്പുറം: ഇന്ത്യയിലെ സ്വകാര്യ ഹജ്ജ് ഗ്രൂപ്പുകൾക്ക് ഇനിമുതൽ നേരിട്ട് 2000 സീറ്റിൽ കുറഞ്ഞ ഹജ്ജ് ക്വാട്ട വിതരണം സഊദി  ഒഴിവാക്കി. സ്വകാര്യ ഹജ്ജ് ഗ്രൂപ്പുകൾക്കായി പുറത്തിറക്കിയ 2025ലെ ഹജ്ജ് പോളിസിയിലാണ് പുതിയ നിർദേശമുള്ളത്. നാളെ  മുതൽ 30 വരെയാണ് സ്വകാര്യ ഹജ്ജ് ഗ്രൂപ്പുകളിൽ നിന്ന് ഓൺലൈൻ അപേക്ഷ സ്വീകരിക്കുക. 20 മുതൽ 26 വരെ ഏജൻസികൾക്കാണ് ഇതോടെ ഹജ്ജിന് സഊദിയിൽനിന്ന് നേരിട്ട് അനുമതി ലഭിക്കുക. ഇവരുടെ നേതൃത്വത്തിൽ മറ്റു ചെറിയ ഏജൻസികൾക്ക് സർവിസ് നടത്താനാകും.     

ഈ വർഷം ഇന്ത്യക്ക് അനുവദിച്ച ഹജ്ജ് ക്വാട്ടയുടെ 30 ശതമാനമാണ് സ്വകാര്യ ഹജ്ജ് ഗ്രൂപ്പുകൾക്ക് വിതരണം ചെയ്യുക. ഇതിനായി 2022-23 സാമ്പത്തിക വർഷം ഹജ്ജ്- ഉംറ നടത്തിപ്പിൽ 75 കോടി രൂപയുടെ വിറ്റുവരവുള്ള, 2000 തീർഥാടകരെ കൊണ്ടുപോകാൻ കഴിവുള്ള ഏജൻസികൾ വേണമെന്നാണ് സഊദി നിർദേശം. 800 മുതൽ 1000 വരെയും 50 മുതൽ 150 വരെയുമാണ് നേരത്തെ ക്വാട്ട അനുവദിച്ചിരുന്നത്. ഇതാണ് രണ്ടായിരമാക്കി മാറ്റിയത്.
   
വിവിധ കാറ്റഗറികളായിട്ടാണ്  ഇത്തവണയും സ്വകാര്യഗ്രൂപ്പുകൾക്ക് കേന്ദ്രസർക്കാറിൻ്റെ  ക്വാട്ട വിതരണം. ഇതിൽ സ്റ്റാർ കാറ്റഗറിയിൽ അപേക്ഷ നൽകുന്നവർ മിനിമം 12 തവണ ഹജ്ജ് -ഉംറ തീർഥാടനങ്ങൾ നടത്തി പരിചയമുള്ള ട്രാവൽ ഏജൻസികളായിരിക്കണം. ഇവർക്ക് കഴിഞ്ഞ മൂന്ന് സാമ്പത്തിക വർഷത്തിൽ 19 കോടിയുടെ (വർഷത്തിൽ 6.6 കോടി) ഹജ്ജ് -ഉംറ ടേണോവറുമുണ്ടാകണം. രണ്ട് വ്യത്യസ്ത സിറ്റികളിൽ രണ്ട് ഓഫിസും 10 ജീവനക്കാരും വേണം. 50 ലക്ഷം രൂപ സെക്യൂരിറ്റി തുക കെട്ടിവെക്കുകയും വേണം. 250 സീറ്റ് ഇത്തരം ഏജൻസികൾക്ക് ലഭിക്കും.
   
തൊട്ടടുത്ത കാറ്റഗറിക്കാർ കഴിഞ്ഞ സാാമ്പത്തിക വർഷങ്ങളിൽ എട്ടു തവണ ഹജ്ജ് - ഉംറ സർവിസ് നടത്തിയവരാവണം. 40 ലക്ഷം സെക്യൂരിറ്റി കെട്ടിവെക്കണം. ഇവർക്ക് 200 സീറ്റ് നൽകും. മൂന്നാം കാറ്റഗറി കഴിഞ്ഞ സാമ്പത്തിക വർഷം 5 കോടി വരുമാനവും 7 തവണ സർവിസ് നടത്തി പരിചയവും വേണം. 30 ലക്ഷമാണ് ഇവർ സെക്യൂരിറ്റി നൽകേണ്ടത്.  100 സീറ്റ് ലഭിക്കും. ഒന്നുമുതൽ ആറ് വരെ ഹജ്ജ് സർവിസ് നടത്തിയവർക്ക് വർഷം ഒന്നര കോടി വിറ്റുവരവ് വേണം. ഇവർ 20 ലക്ഷം സെക്യൂരിറ്റി നൽകണം. 50 സീറ്റ് ആണ് ഇത്തരം ഏജൻസികൾക്ക് നൽകുക. 

പുതിയ ഹജ്ജ് അപേക്ഷകരാണെങ്കിൽ ചുരുങ്ങിയത് രണ്ട് ഉംറ നടത്തിയ പരിചയമുള്ളവരായിരിക്കണം. ഒന്നര കോടിയുടെ വിറ്റുവരവുണ്ടാവണം. 50 ഉംറ തീർഥാടകരെ കൊണ്ടുപോയതിന്റെ വിവരങ്ങൾ നൽകണം. 20 ലക്ഷം രൂപ സെക്യൂരിറ്റി നൽകണം. ഇവർക്ക് 50 സീറ്റ് ലഭിക്കും. നിയമങ്ങൾ പാലിക്കാത്ത, മതിയായ രേഖകൾ ഹാജരാക്കാത്ത ഏജൻസികളുടെ അപേക്ഷ നിരസിക്കും.

Saudi Arabia has removed the direct allotment of Hajj quotas for private Hajj groups with less than 2000 seats in its newly issued 2025 Hajj policy. Online applications from private Hajj groups will be accepted from tomorrow until the 30th. Between the 20th and 26th, agencies will receive direct approval from Saudi Arabia to conduct Hajj services, allowing smaller agencies to operate under their supervision.