ന്യൂഡല്‍ഹി: യാഗി ചുഴലിക്കാറ്റിനെ തുടര്‍ന്നുണ്ടായ കനത്തമഴയിലും, വെള്ളപ്പൊക്കത്തിലും 
മ്യാന്‍മറില്‍ 113 പേര്‍ മരിച്ചു. മൂന്ന് ലക്ഷത്തിലേറെ പേര്‍ക്ക് വീടുകള്‍ നഷ്ടപ്പെട്ടതായും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. മേഖലയില്‍ സൈന്യത്തിന്റെ നേതൃത്വത്തില്‍ രക്ഷാപ്രവര്‍ത്തനം പുരോഗമിക്കുകയാണ്. 

ഈ വര്‍ഷം ഏഷ്യയിലുണ്ടായ ഏറ്റവും ശക്തമായ ചുഴലിക്കാറ്റാണ് യാഗി. മ്യാന്‍മറിന് പുറമെ, വിയറ്റ്‌നാം, തായ്‌ലന്റ്, ലാവോസ് തുടങ്ങയി രാജ്യങ്ങളിലും വലിയ നാശനഷ്ടങ്ങളാണ് റിപ്പോര്‍ട്ട് ചെയ്തിട്ടുള്ളത്. കഴിഞ്ഞ തിങ്കളാഴ്ച്ചയോടെയാണ് മ്യാന്‍മറില്‍ വെള്ളപ്പൊക്കം ആരംഭിച്ചത്. മോണ്‍, കയാഹ്, കയിന്‍ സംസ്ഥാനങ്ങള്‍ക്കൊപ്പം തലസ്ഥാനമായ നയ്പിഡോയയിലും വെള്ളപ്പൊക്കം ബാധിച്ചു. അഞ്ച് അണക്കെട്ടുകളും, നാല് പഗോഡകളും തകര്‍ന്നതായി റിപ്പോര്‍ട്ടുകളുണ്ട്. 

അതേസമയം യാഗി ചുഴലിക്കാറ്റ് നാശംവിതച്ച രാജ്യങ്ങളിലേക്ക് ഇന്ത്യ സഹായങ്ങളെത്തിക്കും. അതിന്റെ നടപടികള്‍ ആരംഭിച്ചതായി വിദേശകാര്യ മന്ത്രി എസ്. ജയശങ്കര്‍ അറിയിച്ചു. മ്യാന്‍മാര്‍, വിയറ്റ്‌നാം, ലാവോസ് തുടങ്ങിയ രാജ്യങ്ങളിലേക്കാണ് ഓപ്പറേഷന്‍ സദ്ഭാവ് എന്ന പേരില്‍ ഇന്ത്യ സഹായം അയച്ചിരിക്കുന്നത്. ഭക്ഷ്യവസ്തുക്കള്‍, വസ്ത്രങ്ങള്‍, മരുന്നുകള്‍ എന്നിവയുള്‍പ്പെടെ 10 ടണ്‍ അവശ്യസാധനങ്ങള്‍ വ്യോമസേനയുടെ വിമാനത്തില്‍ അയച്ചു.

Cyclone Yagi ravages Myanmar 113 people have died so far India with help