ഭുവനേശ്വർ: ഗവ. എൻജിനീയറിങ് കോളജ് ഹോസ്റ്റലിൽ ഭക്ഷണത്തിനായി ബീഫ് പാകം ചെയ്ത ഏഴ് വിദ്യാർഥികൾക്കെതിരെ നടപടി. ഒഡിഷയിലെ ബെർഹാംപൂരിലുള്ള പരാല മഹാരാജ എൻജിനീയറിങ് കോളജിലാണ് വിദ്യാർഥികളെ ഹോസ്റ്റലിൽനിന്നു പുറത്താക്കിയത്. നിരോധിത പ്രവർത്തനങ്ങളിൽ ഏർപ്പെട്ടെന്ന് ആരോപിച്ചാണു വിദ്യാർഥികൾക്കെതിരെ നടപടി. പുറത്താക്കിയതിന് പുറമെ ഒരു വിദ്യാർഥിക്ക് 2,000 രൂപ പിഴ ചുമത്തുകയും ചെയ്തിട്ടുണ്ട്.

കഴിഞ്ഞ ബുധനാഴ്ചയാണ് വിദ്യാർഥികൾ ഹോസ്റ്റലിൽ ബീഫ് ഇറച്ചി ഭക്ഷണത്തിനായി പാകം ചെയ്തത്. ഇത് ഒരു വിഭാഗം വിദ്യാർഥികൾ കോളേജ് പ്രിൻസിപ്പലിനെ അറിയിക്കുകയായിരുന്നു. ബജ്‌റങ്ദൾ, വിഎച്ച്പി പ്രവർത്തകർ സംഭവത്തിൽ പ്രതിഷേധവുമായി രംഗത്തെത്തിയിരുന്നു. സംഭവത്തിൽ വിഎച്ച്പി ഗോപാൽപൂർ പൊലിസിൽ പരാതി നൽകുകയും ചെയ്തിട്ടുണ്ട്. ഇതിനിടെയാണ് വിദ്യാർഥികളെ ഹോസ്റ്റലിൽനിന്നു കോളജ് അധികൃതർ പുറത്താക്കി ഉത്തരവിറക്കിയത്. 

സ്ഥാപനത്തിന്റെ പെരുമാറ്റച്ചട്ടം ലംഘിച്ചതിനാണ് വിദ്യാർഥിൾക്കെതിരെ നടപടി സ്വീകരിച്ചതെന്ന് കോളേജ്  അധികൃതർ പറഞ്ഞു. വിദ്യാർഥികളുടെ പരാതിയിൽ അന്വേഷണം നടത്തിയ ശേഷമാണ് ഹോസ്റ്റലിൽനിന്നു പുറത്താക്കാൻ തീരുമാനിച്ചത്. നടപടിയെ കുറിച്ച് ഇവരുടെ രക്ഷിതാക്കളെ അറിയിച്ചിട്ടുണ്ടെന്നും അധികൃതർ പറഞ്ഞു.