ദുബൈ: വയനാട് ഉരുൾപ്പൊട്ടൽ ദുരന്തവുമായി ബന്ധപ്പെട്ട ചെലവിനെ കുറിച്ചുള്ള സർക്കാർ വിശദീകരണവും തെറ്റെന്ന് മുസ്ലീം ലീഗ് സംസ്ഥാന ജനറൽ സെക്രട്ടറി പി.എം.എ സലാം. കേന്ദ്രത്തിൽ സമർപ്പിക്കാൻ തയാറാക്കിയ എസ്റ്റിമേറ്റ് തുകയെന്ന റവന്യൂ വകുപ്പിന്റെ വാദം അടിസ്ഥാന രഹിതമാണെന്നും അദ്ദേഹം ദുബൈയിൽ വാർഥാ സമ്മേളനത്തിൽ പറഞ്ഞു. ചെലവാക്കിയ കണക്കിനെ കുറിച്ചാണ് സർക്കാർ റിപ്പോർട്ട് നൽകിയത്. ചെലവാക്കാൻ ഉദ്ദേശിക്കുന്ന തുകയെ കുറിച്ചല്ല.കേന്ദ്രത്തിന് കള്ളക്കണക്കാണോ സംസ്ഥാന സർക്കാർ നൽകുകയെന്നും അദ്ദേഹം ചോദിച്ചു.

സർക്കാരുകൾ തമ്മിൽ കൃത്യമായ കണക്കല്ലേ നൽകേണ്ടത്? മൃതദേഹം സംസ്കരിക്കാൻ 75,000 രൂപ വീതം ചെലവാക്കിയെന്ന സർക്കാർ കണക്ക് മരിച്ചവരുടെ കുടുംബത്തെ അപമാനിക്കലാണ്. കണക്ക് കൃത്യമാണെന്ന് തെളിയിക്കാൻ മുസ്ലീം ലീഗ് സംസ്ഥാന സർക്കാരിനെ വെല്ലുവിളിക്കുന്നുവെന്നും അദ്ദേഹം പറഞ്ഞു. 

ഭക്ഷണവും വസ്ത്രങ്ങളും മൃതദേഹങ്ങൾ സംസ്കരിക്കാനുള്ള സ്ഥലവും കുഴിയെടുക്കാനുള്ള ജെ.സി.ബിയുമെല്ലാം സൗജന്യമായാണ് ലഭിച്ചത്. ആവശ്യത്തിന് സാധനങ്ങൾ ലഭിച്ചെന്ന് മുഖ്യമന്ത്രിയും വയനാട് കലക്ടറും തന്നെയാണ് അന്ന് പറഞ്ഞത്. സർക്കാരിന് നയാ പൈസ ചെലവായിട്ടില്ലെന്നും പി.എം.എ സലാം പറഞ്ഞു. യു.എ.ഇ കെ.എം.സി.സി ജനറൽ സെക്രട്ടറി പി.കെ അൻവർ നഹയും വാർത്താ സമ്മേളനത്തിൽ പങ്കെടുത്തു.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക