മസ്‌കത്ത്: ഓണ്‍ലൈന്‍ തട്ടിപ്പുകള്‍ വര്‍ധിക്കുന്ന സാഹചര്യത്തില്‍ പൊതുജനങ്ങള്‍ കൂടുതല്‍ ജാഗ്രത പാലിക്കണമെന്ന് ഒമാന്‍ സെന്‍ട്രല്‍ ബാങ്ക് മുന്നറിയിപ്പ് നല്‍കി. ഈദ് ആഘോഷങ്ങള്‍ക്ക് മുന്നോടിയായി ഡിജിറ്റല്‍ ഇടപാടുകള്‍ കൂടുന്ന സമയമായതിനാല്‍ തട്ടിപ്പുകാര്‍ സജീവമാകുന്നുവെന്നാണ് അധികൃതരുടെ വിലയിരുത്തല്‍.

സോഷ്യല്‍ മീഡിയ, ഫോണ്‍ കോളുകള്‍, വ്യാജ സന്ദേശങ്ങള്‍ തുടങ്ങിയവ വഴിയാണ് തട്ടിപ്പുകള്‍ നടക്കുന്നതെന്ന് സെന്‍ട്രല്‍ ബാങ്ക് അധികൃതര്‍ ചൂണ്ടിക്കാട്ടുന്നു. ബാങ്കുകളുടെ പേരില്‍ സന്ദേശങ്ങള്‍ അയച്ച് വ്യക്തിഗത വിവരങ്ങള്‍ കൈപ്പറ്റാന്‍ ശ്രമിക്കുന്ന സംഭവങ്ങള്‍ അടുത്തിടെ റിപ്പോര്‍ട്ട് ചെയ്തിട്ടുണ്ട്.

ഒ.ടി.പി, ബാങ്ക് അക്കൗണ്ട് വിവരങ്ങള്‍, ഡെബിറ്റ്/ക്രെഡിറ്റ് കാര്‍ഡ് നമ്പറുകള്‍ തുടങ്ങിയ പ്രധാന വിവരങ്ങള്‍ ഒരിക്കലും മറ്റൊരാളുമായും പങ്കുവെക്കരുതെന്ന് അധികൃതര്‍ വീണ്ടും ഓര്‍മ്മിപ്പിച്ചു. ബാങ്ക് ഉദ്യോഗസ്ഥരെന്ന വ്യാജേന വിളിച്ച് വിവരങ്ങള്‍ ചോദിക്കുന്ന രീതിയും ഇപ്പോള്‍ കൂടുതലായതായി ശ്രദ്ധയില്‍പ്പെട്ടിട്ടുണ്ട്.

സംശയകരമായ ഫോണ്‍ കോളുകളിലും ലിങ്കുകളിലും വിശ്വാസം വെക്കാതെ, ആവശ്യമെങ്കില്‍ നേരിട്ട് ബാങ്കുമായി ബന്ധപ്പെടുക എന്നതാണ് ഏറ്റവും സുരക്ഷിതമായ മാര്‍ഗമെന്ന് നിര്‍ദ്ദേശം. അനധികൃത ഇടപാടുകള്‍ ശ്രദ്ധയില്‍പ്പെട്ടാല്‍ ഉടന്‍ റിപ്പോര്‍ട്ട് ചെയ്യണമെന്നും ഉപഭോക്താക്കളോട് ആവശ്യപ്പെട്ടു.

സുരക്ഷിതമായ ഓണ്‍ലൈന്‍ ബാങ്കിംഗ് രീതികള്‍ പിന്തുടരണമെന്നും സെന്‍ട്രല്‍ ബാങ്ക് നിര്‍ദേശിക്കുന്നു. ഔദ്യോഗിക ആപ്പുകളും വെബ്‌സൈറ്റുകളും മാത്രം ഉപയോഗിക്കുക, പൊതുസ്ഥലങ്ങളിലെ വൈഫൈ വഴി സാമ്പത്തിക ഇടപാടുകള്‍ നടത്തുന്നത് ഒഴിവാക്കുക എന്നിവയും മുന്നറിയിപ്പില്‍ ഉള്‍പ്പെടുന്നു.

ALSO READ: മസ്‌കത്ത് വിമാനത്താവളത്തില്‍ 4,900ലധികം ലഹരിഗുളികകള്‍ പിടിയില്‍

ഓണ്‍ലൈന്‍ തട്ടിപ്പുകള്‍ മൂലം നഷ്ടം അനുഭവിക്കുന്നവരുടെ എണ്ണം വര്‍ധിക്കുന്ന സാഹചര്യത്തില്‍ പൊതുജനങ്ങളില്‍ കൂടുതല്‍ ബോധവല്‍ക്കരണം സൃഷ്ടിക്കുകയാണ് ഈ മുന്നറിയിപ്പിന്റെ ലക്ഷ്യമെന്ന് അധികൃതര്‍ വ്യക്തമാക്കി. ജാഗ്രത പാലിക്കുന്നതിലൂടെ ഇത്തരം തട്ടിപ്പുകള്‍ വലിയ തോതില്‍ ഒഴിവാക്കാനാകുമെന്ന് അവര്‍ കൂട്ടിച്ചേര്‍ത്തു.

The Central Bank of Oman has warned the public about a rise in online fraud ahead of Eid, urging customers to stay alert and avoid sharing OTPs or banking details with unknown sources.