ദുബൈ: നിയമ വിരുദ്ധ താമസക്കാർക്ക് പിഴയോ, യാത്ര നിരോധനമോ കൂടാതെ രാജ്യം വിടുന്നതിനോ താമസ പദവി നിയമപരമാക്കി യു.എ.ഇയിൽ തുടരുന്നതിനോ സൗകര്യമൊരുക്കി സർക്കാർ പ്രഖ്യാപിച്ച പൊതുമാപ്പ് കാലാവധി നീട്ടില്ലെന്ന് ഐ.സി.പി താമസ-കുടിയേറ്റ വിഭാഗം ഡയരക്ടർ ജനറൽ മേജർ ജനറൽ സുൽത്താൻ യൂസഫ് നുഐമി വ്യക്തമാക്കി.

പൊതുമാപ്പ് കാലാവധി ഈ മാസത്തോടെ അവസാനിക്കുമെന്നും അദ്ദേഹം പറഞ്ഞു. നവംബർ ഒന്നാം തിയതി മുതൽ നിയമലംഘകരെ കണ്ടത്തുന്നതിന് കർശന പരിശോധന നടത്തുമെന്ന് അദ്ദേഹം മുന്നറിയിപ്പ് നൽകി. താമസ കേന്ദ്രങ്ങൾ, വ്യവസായ മേഖലകൾ, കമ്പനികൾ എന്നിവ കേന്ദ്രീകരിച്ചാവും പരിശോധനകൾ.
 

നിയമ വിരുദ്ധ താമസക്കാർ ഉണ്ടാവാനിടയുള്ള മേഖലകളിൽ തുടർച്ചയായ നിരീക്ഷണം ഉണ്ടാകുമെന്നും അദ്ദേഹം പറഞ്ഞു. നിയമം ലംഘിച്ച് രാജ്യത്ത് തുടരുന്നവർ എത്രയും വേഗം ബന്ധപ്പെട്ട സർക്കാർ-സേവന കേന്ദ്രങ്ങളെ സമീപിച്ച് താമസ പദവി നിയമപരമാക്കണമെന്ന് മേജർ ജനറൽ ആവശ്യപ്പെട്ടു.സ്വദേശത്തേക്ക് തിരിച്ചു പോകാൻ ആഗ്രഹിക്കുന്നവർക്ക് പിഴയോ യാത്രാ നിരോധനമോ ഇല്ലാതെ തന്നെ മടങ്ങാൻ സാധിക്കുമെന്നും അദ്ദേഹം പറഞ്ഞു.

🪀 കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക