പാലക്കാട്: ഉപതെരഞ്ഞെടുപ്പിൽ ഏറ്റവും ശ്രദ്ധാകേന്ദ്രമാകുക പാലക്കാട് നിയമസഭാ മണ്ഡലമാകും. കഴിഞ്ഞ രണ്ടുതവണകളിലായി കണ്ട  ത്രികോണപ്പോരാണ് പാലക്കാടിനെ ശ്രദ്ധാകേന്ദ്രമാക്കുന്നത്. പാലക്കാട് താലൂക്കിലെ പാലക്കാട് നഗരസഭയും പിരായിരി, കണ്ണാടി പഞ്ചായത്തുകളും ആലത്തൂർ താലൂക്കിലെ മാത്തൂർ ഗ്രാമപഞ്ചായത്തും ഉൾപ്പെട്ട മണ്ഡലം യു.ഡി.എഫ് അനുകൂല മണ്ണാണെങ്കിലും കടുത്ത പോരാട്ടത്തിലൂടെ പിടിച്ചെടുക്കാനുള്ള ശ്രമത്തിലാണ് ബി.ജെ.പി.  

തെരഞ്ഞെടുപ്പ് പ്രഖ്യാപനത്തിന് മുമ്പേ പി.വി അൻവർ എം.എൽ.എ തൊടുത്തുവിട്ട രാഷ്ട്രീയ ആരോപണങ്ങളും പാലക്കാട് ഉപതെരഞ്ഞെടുപ്പ് ഫലത്തെ രാഷ്ട്രീയകേരളം ഉറ്റുനോക്കാൻ ഇടയാക്കി.  സംസ്ഥാനം രൂപീകൃതമായത് മുതൽ 2011വരെയും യു.ഡി.എഫ്-എൽ.ഡി.എഫ് മുന്നണികൾക്കൊപ്പം മാറിമാറി നിന്ന മണ്ഡലത്തിൽ 2016 മുതലാണ് കടുത്ത ത്രികോണ മത്സരത്തിന് വേദിയാകുന്നത്. 1970ൽ ഒ. രാജഗോപാൽ ജനസംഘം സ്ഥാനാർഥിയായത് മുതൽ ഇടത്  വലത് മുന്നണി മത്സരത്തിനപ്പുറത്തേക്ക് പാലക്കാട് തെരഞ്ഞെടുപ്പ് ചിത്രം മാറിത്തുടങ്ങിയിരുന്നു. 2006ൽ ഒ. രാജഗോപാൽ ബി.ജെ.പി സ്ഥാനാർഥിയായി 24.84 ശതമാനം വോട്ട് നേടി.

2016ലെ തെരഞ്ഞെടുപ്പോടെയാണ് ബി.ജെ.പി മണ്ഡലത്തിൽ വ്യക്തമായ സാന്നിധ്യമറിയിച്ച് തുടങ്ങിയത്.  57,559 വോട്ടുനേടി ഷാഫി പറമ്പിൽ മണ്ഡലം നിലനിർത്തിയപ്പോൾ 40,076 വോട്ടുമായി ബി.ജെ.പിയിലെ ശോഭ സുരേന്ദ്രൻ രണ്ടാംസ്ഥാനത്തെത്തുകയായിരുന്നു. സി.പി.എമ്മിലെ എൻ.എൻ കൃഷ്ണദാസ് മണ്ഡല ചരിത്രത്തിൽ ആദ്യമായി 38,675 വോട്ടുമായി മൂന്നാമതുമായി. 

2021ലും കടുത്ത പോരാട്ടത്തിലൂടെ 3859 വോട്ടുകളുടെ ഭൂരിപക്ഷത്തിൽ മണ്ഡലം ഷാഫി പറമ്പിൽ നിലനിർത്തിയപ്പോൾ മെട്രോമാൻ ഇ. ശ്രീധരനെ രംഗത്തിറക്കി വീണ്ടും മുന്നേറ്റമുണ്ടാക്കുകയായിരുന്നു ബി.ജെ.പി. 2016ൽ 29.07 ശതമാനം വോട്ട് നേടിയ ബി.ജെ.പിക്ക് ഇ. ശ്രീധരൻ സ്ഥാനാർഥിയായതോടെ 35.34 ശതമാനം വോട്ട് നേടാനായി. സി.പി പ്രമോദിനെ മത്സരിപ്പിച്ച സി.പി.എം  മൂന്നാമതായെന്ന് മാത്രമല്ല, വോട്ടിങ് ശതമാനത്തിലും ഗണ്യമായ കുറവുണ്ടായി.

മണ്ഡലം നിലനിർത്താൻ യു.ഡി.എഫ് യൂത്ത് കോൺഗ്രസ് അധ്യക്ഷൻ രാഹുൽ മാങ്കൂട്ടത്തിലിനെ രംഗത്തിറക്കുമ്പോൾ 2016ലെ വലിയ മുന്നേറ്റമുണ്ടാക്കിയ ശോഭ സുരേന്ദ്രനെ പരീക്ഷിക്കാനാണ് ബി.ജെ.പി ഒരുങ്ങുന്നത്. ജില്ലാ പഞ്ചായത്ത് പ്രസിഡന്റ് കെ. ബിനുമോളെയാണ് എൽ.ഡി.എഫ് പരിഗണിക്കുന്നത്.