കോഴിക്കോട്: മലാപ്പറമ്പിൽ ഫ്‌ളാറ്റ് വാടകക്കെടുത്ത് യുവതികളെ എത്തിച്ച് പൊലിസുകാർ അനാശാസ്യ കേന്ദ്രം നടത്തിയ കേസിൽ കുറ്റപത്രം തയാറാക്കുന്നു. രണ്ട് പൊലിസുകാരുൾപ്പെടെ എട്ട് പ്രതികൾക്കെതിരേയാണ് നടക്കാവ് പൊലിസ് കുറ്റപത്രം തയാറാക്കുന്നത്.

ALSO READ: മലാപ്പറമ്പ് സെക്‌സ് റാക്കറ്റ് കേസ്: ഒളിവില്‍ കഴിഞ്ഞിരുന്ന രണ്ട് പൊലിസ് ഡ്രൈവര്‍മാര്‍ പിടിയില്‍

അനാശാസ്യ കേന്ദ്രവുമായി ബന്ധപ്പെട്ട് കൂടുതൽ പൊലിസുകാർക്ക് പങ്കുണ്ടെന്ന ആരോപണം ഉയർന്നിരുന്നു. പ്രതികളുടെ കോൾഡീറ്റെയിൽ റെക്കോർഡുൾപ്പെടെ അന്വേഷണത്തിന്റെ ഭാഗമായി പൊലിസ് ശേഖരിച്ചെങ്കിലും അനാശാസ്യ കേന്ദ്രം നടത്തിപ്പിന് പിന്നിൽ മറ്റാർക്കും പങ്കില്ലെന്നാണ് കണ്ടെത്തൽ. അതേസമയം ഇവിടെ സന്ദർശകരായി എത്തുന്നവരിലേക്ക് അന്വേഷണം വ്യാപിപ്പിച്ചിട്ടില്ല. നിലവിൽ പൊലിസ് ഡ്രൈവർമാരായ പെരുമണ്ണ കുന്നമ്മൽ കെ.ഷൈജിത്ത്, കുന്ദമംഗലം പടനിലം കൊല്ലത്തൊടി കെ.സനിത് , വയനാട് സ്വദേശി ബിന്ദു, അഭിരാമി, പത്തനംതിട്ട സ്വദേശി ഉപേഷ്, ബിന്ദുവിന്റെ പങ്കാളി അമിനേഷ്, ഇടപാടുകാരായ ഷക്കീർ, നിയാസ് എന്നിവരാണ് പ്രതിസ്ഥാനത്തുള്ളത്. ഇതിൽ അമിനേഷ് വിദേശത്താണ്. മറ്റുള്ള പ്രതികൾക്ക് കോടതി ജാമ്യം അനുവദിച്ചു.

ALSO READ: കറപുരണ്ട് കാക്കി; പെൺവാണിഭം മുതൽ കോടികളുടെ തട്ടിപ്പ് വരെ

ജൂൺ ആറിനാണ് മലാപ്പറമ്പിൽ അനാശാസ്യ കേന്ദ്രത്തിൽ പൊലിസ് പരിശോധന നടത്തിയത്. ഇരകളുൾപ്പെടെ ഒൻപത് പേരെയായിരുന്നു പിടികൂടിയത്. ഇതിൽ ഇരകളായ നാലുപേർക്കെതിരേ കേസെടുത്തിരുന്നില്ല. രഹസ്യാന്വേഷണ വിഭാഗം റിപ്പോർട്ടിന്റെ അടിസ്ഥാനത്തിലായിരുന്നു പരിശോധന. അനാശാസ്യ കേന്ദ്രം നടത്തിപ്പിന് പിന്നിൽ പൊലിസുകാർക്ക് പങ്കുണ്ടെന്നായിരുന്നു റിപ്പോർട്ട്. വയനാട് സ്വദേശി ബിന്ദുവിന്റെ ഫോൺ പരിശോധിച്ചതോടെ പൊലിസുദ്യോഗസ്ഥരുടെ പങ്ക് വ്യക്തമായി. ബാങ്ക് അക്കൗണ്ടുകൾ പരിശോധിച്ചപ്പോൾ സാമ്പത്തിക ഇടപാടുകൾ സംബന്ധിച്ചും കണ്ടെത്തി. ഇതോടെ പൊലിസ് ഡ്രൈവർമാരെ പ്രതിചേർത്തു. ഇരുവരേയും പിന്നീട് സർവിസിൽ നിന്ന് സസ്പൻഡ് ചെയ്തു. ഇതിന് പിന്നാലെ ഒളിവിൽ പോയ പൊലിസുകാരെ ഏഴ് ദിവസത്തിന് ശേഷമാണ് പിടികൂടിയത്. നടക്കാവ് ഇൻസ്പക്ടർ എൻ.പ്രജീഷിന്റെ നേതൃത്വത്തിലുള്ള സംഘമാണ് കേസന്വേഷിച്ചത്.