പട്‌ന: ബിഹാറിലെ സിവാന്‍, സരണ്‍ ജില്ലകളില്‍ വ്യാജമദ്യം കഴിച്ചതിനെ തുടര്‍ന്ന് ആറുപേര്‍ മരിച്ചു. 14 പേര്‍ ചികിത്സയില്‍. സിവാന്‍ ജില്ലയില്‍ നാലും, സരണ്‍ ജില്ലയില്‍ രണ്ട് പേരുമാണ് മരിച്ചത്. 

ബുധനാഴ്ച്ച രാവിലെ 7.30 ഓടെ മാഘര്‍, ഔരിയ പഞ്ചായത്തുകളില്‍ മൂന്നുപേര്‍ ദുരൂഹ സാഹചര്യത്തില്‍ മരിച്ചതായി വിവരം ലഭിച്ചിരുന്നു. തുടര്‍ന്ന് നടത്തിയ അന്വേഷണത്തിലാണ് മദ്യദുരന്തമാണെന്ന് കണ്ടെത്തിയത്. മറ്റുള്ളവരെ ചികിത്സക്കായി അടുത്ത ആശുപത്രിയില്‍ എത്തിച്ചെങ്കിലും ഒരാള്‍ അതിന് മുന്‍പ് തന്നെ മരിച്ചു. 

ചൊവ്വാഴ്ച്ച രാത്രിയാണ് ഇവര്‍ വ്യാജ മദ്യം കഴിച്ചതെന്ന് ദൃക്‌സാക്ഷികളുടെ മൊഴിയുണ്ട്. സംഭവത്തില്‍ ജില്ല ഭരണകൂടം ഉന്നതതല അന്വേഷണത്തിന് ഉത്തരവിട്ടുണ്ട്. 

അതേസമയം മരിച്ചവരുടെ മൃതദേഹങ്ങള്‍ പോസ്റ്റ്‌മോര്‍ട്ടത്തിന് അയച്ചിട്ടുണ്ടെന്നും, അതിന് ശേഷം മാത്രമേ യഥാര്‍ഥ കാരണം വ്യക്തമാകൂവെന്നും ജില്ല മജിസ്‌ട്രേറ്റ് അറിയിച്ചു. 

2016 ഏപ്രിലില്‍ നിതീഷ് കുമാര്‍ സര്‍ക്കാര്‍ ബിഹാറില്‍ മദ്യവില്‍പ്പനയും ഉപഭോഗവും നിരോധിച്ച് ഉത്തരവിറക്കിയിരുന്നു. ഇതിന് ശേഷം ഏകദേശം 150ലധികം ആളുകള്‍ വ്യാജമദ്യം കഴിച്ച് മരിച്ചതായാണ് സര്‍ക്കാര്‍ റിപ്പോര്‍ട്ടിലുള്ളത്.

toxic liquor disaster again in Bihar Six died 14 people are under treatment