ന്യൂഡല്‍ഹി: മദ്രസകള്‍ക്കെതിരായ ബാലാവകാശ കമ്മിഷന്‍ ഉത്തരവുകള്‍ സ്‌റ്റേ ചെയ്ത് സുപ്രിംകോടതി. അംഗീകാരമില്ലാത്ത മദ്രസകളിലെ വിദ്യാര്‍ത്ഥികളെയും സര്‍ക്കാര്‍ എയ്ഡഡ് മദ്രസകളില്‍ പഠിക്കുന്ന അമുസ്ലിം വിദ്യാര്‍ത്ഥികളെയും സര്‍ക്കാര്‍ സ്‌കൂളുകളിലേക്ക് മാറ്റാന്‍ നിര്‍ദ്ദേശിച്ച ഉത്തര്‍പ്രദേശ്, ത്രിപുര സര്‍ക്കാരുകളുടെ സമീപകാല ഉത്തരവുകളും കോടതി സ്റ്റേ ചെയ്തു.

ന്യൂനപക്ഷങ്ങള്‍ക്ക് സ്വന്തം വിദ്യാഭ്യാസ സ്ഥാപനങ്ങള്‍ സ്ഥാപിക്കാനും നിയന്ത്രിക്കാനുമുള്ള അവകാശങ്ങളെ ലംഘിക്കുന്നുവെന്ന് കാണിച്ച് ജമിയത്ത് ഉലമ-ഇ- ഹിന്ദ് സമര്‍പ്പിച്ച ഹരജിയിലാണ് സുപ്രിംകോടതിയുടെ നിര്‍ണായക നടപടി. 

ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസുമാരായ ജെ ബി പര്‍ദിവാല, മനോജ് മിശ്ര എന്നിവരുടെ നേതൃത്വത്തിലുള്ള സുപ്രിം കോടതി ബെഞ്ചാണ് ഹരജി പരിഗണിച്ചത്. വിഷയത്തില്‍ കേന്ദ്ര- സംസ്ഥാന സര്‍ക്കാരുകള്‍ക്ക് കോടതി നോട്ടിസ് അയച്ചു. നാലാഴ്ച്ചകം മറുപടി നല്‍കണമെന്നാണ് നിര്‍ദ്ദേശം. 

ദേശീയ ബാലാവകാശ സംരക്ഷണ കമ്മിഷന്റെ (എന്‍സിപിസിആര്‍) ശുപാര്‍ശയും വിദ്യാഭ്യാസ അവകാശ നിയമവും (ആര്‍ടിഇ) പാലിക്കുന്നില്ലെന്ന് ആരോപിച്ചാണ് സര്‍ക്കാര്‍ ധനസഹായത്തോടെ പ്രവര്‍ത്തിക്കുന്ന മദ്രസകള്‍ അടച്ചുപൂട്ടാന്‍ ബാലാവകാശ കമ്മിഷന്‍ ഉത്തരവിട്ടത്.