റിയാദ്: സഊദിയിലെ പ്രധാന വിനോദ വിനോദസഞ്ചാര ഉത്സവമായ റിയാദ് സീസണില്‍ 60 വയസും അതില്‍ കൂടുതലുമുള്ള സഊദി പൗരന്മാര്‍ക്കും പ്രവാസികള്‍ക്കും സൗജന്യ പ്രവേശനം അനുവദിച്ചതായി സംഘാടകര്‍ അറിയിച്ചു.

ഈ വര്‍ഷത്തെ റിയാദ് സീസണില്‍ മുഴുവനും എല്ലാ മുതിര്‍ന്ന ആളുകള്‍ക്കും ഫെസ്റ്റിവലിന്റെ എല്ലാ മേഖലകളിലേക്കും സൗജന്യ പ്രവേശനം ലഭിക്കുമെന്ന് ജനറല്‍ എന്റര്‍ടൈന്‍മെന്റ് അതോറിറ്റി (ജിഇഎ) തലവന്‍ തുര്‍ക്കി അല്‍ അല്‍ഷൈഖ് വ്യക്തമാക്കി.

തവക്കല്‍ന ആപ്പ് വഴി പ്രവേശന കാര്‍ഡ് നേടാന്‍ കഴിയുമെന്ന് സോഷ്യല്‍ മീഡിയ പ്ലാറ്റ്‌ഫോമായ എക്‌സിലൂടെ അധികൃതര്‍ അറിയിച്ചു. ഒക്ടോബര്‍ 12ന് ആരംഭിച്ച റിയാദ് സീസണ്‍ ഒരാഴ്ചയ്ക്കിടെ 2 ദശലക്ഷം സന്ദര്‍ശകരെ ആകര്‍ഷിച്ചുവെന്നാണ് കഴിഞ്ഞ ദിവസം അധികൃതര്‍ അറിയിച്ചത്. ഫെസ്റ്റിവലിന്റെ അഞ്ചാം പതിപ്പില്‍ 14 സോണുകള്‍, 1 ലോക ചാമ്പ്യന്‍ഷിപ്പുകള്‍, 10 എക്‌സിബിഷനുകള്‍ എന്നിവയാണ് ഒരുക്കിയിട്ടുള്ളത്.

സഊദി എയര്‍ലൈന്‍സുമായി സഹകരിച്ച് തയ്യാറാക്കിയ പുതിയ സോണായ ബൊളിവാര്‍ഡ് റണ്‍വേയാണ് ഇവന്റിന്റെ പ്രധാന സവിശേഷത. കഴിഞ്ഞ മാസം ജിദ്ദയില്‍ നിന്നും ആഘോഷമാക്കി കൊണ്ടുപോയ പഴയ സഊദി എയര്‍ ലൈന്‍സിന്റെ ഭാഗങ്ങളാലാണ് ഈ സോണ്‍ സജ്ജീകരിച്ചത്. 9,000 ആളുകളെ ഉള്‍കൊള്ളുന്നതാണ് ഈ സോണ്‍. വിനോദത്തിനും ഭക്ഷണ ശാലകള്‍ക്കായുമെല്ലാം പഴയ വിമാനങ്ങള്‍ ഉപയോഗിക്കുന്നുണ്ട്.

കൂടുതൽ ഗൾഫ് വാർത്തകൾക്ക് ഈ ഗ്രൂപ്പിൽ ജോയിൻ ചെയ്യുക

The Riyadh Season Festival welcomes Saudis and expatriates over 60 with complimentary entry, promoting inclusivity and entertainment for all ages.