കൊച്ചി: വീട്ടില്‍ ആളില്ലാത്ത നേരത്ത് ജപ്തി നടപടി സ്വീകരിച്ച് ബാങ്കിന്റെ ക്രൂരത. എസ്.ബി.ഐ ബാങ്കിന്റെ നടപടിയില്‍ പെരുവഴിയിലായിരിക്കുകയാണ് കളമശ്ശേരി സ്വദേശി അജയനും കുടംബവും. സംഭവത്തില്‍ പരാതി ഉയര്‍ന്നതിനെ തുടര്‍ന്ന് വ്യവസായ മന്ത്രി പി രാജീവ് ഇടപെട്ടിട്ടുണ്ട്. 

വീട്ടില്‍ ആളില്ലാത്തതിനാല്‍ വീട് കുത്തിത്തുറന്നാണ് എസ് ബി ഐ അധികൃതര്‍ വീടിനുളളില്‍ കയറിയത്. രാവിലെ ജോലിക്ക് പോയ ഭാര്യയും ഭര്‍ത്താവും  പഠിക്കുന്ന മക്കളും തിരികെയെത്തിയപ്പോഴാണ് ഗേറ്റടക്കം ബാങ്ക് പൂട്ടിയിരിക്കുന്നത് കണ്ടത്. 

ഒറ്റത്തവണ തീര്‍പ്പാക്കലിന് ശ്രമം നടത്തിയെങ്കിലും ബാങ്ക് അനുകൂല നടപടി സ്വീകരിച്ചില്ലെന്ന് കുടുംബം ആരോപിച്ചു. 33 ലക്ഷം രൂപ നല്‍കാനാണ് ബാങ്ക് ആവശ്യപ്പെട്ടത്. ഇതുപ്രകാരം 5 ലക്ഷം അടച്ചു. 
എന്നാല്‍ പിന്നീട് ബാങ്ക് അധികൃതര്‍ സെറ്റില്‍മെന്റില്‍ നിന്ന് പിന്‍മാറുകയായിരുന്നു. തുക കൂട്ടി ആവശ്യപ്പെട്ട അധികൃതര്‍ 50 ലക്ഷം രൂപ അടയ്ക്കണമെന്ന് ആവശ്യപ്പെട്ടെന്നും കുടുംബം പറഞ്ഞു. 

എസ് ബി ഐയുടെ എംജി റോഡ് ശാഖയില്‍ നിന്ന് 2014 ലാണ് അജയന്‍ 27 ലക്ഷം ലോണ്‍ എടുത്തത്. ബെഹ്‌റിനില്‍ ജോലി ചെയ്യവേ 14 ലക്ഷം തിരിച്ചു അടച്ചു. പ്രവാസിയായിരുന്ന അജയന് കോവിഡില്‍ ഗള്‍ഫിലെ ജോലി നഷ്ടം ആയി. പിന്നീട് നാട്ടിലേക്ക് മടങ്ങി. ഈ സമയത്ത് ലോണ്‍ തിരിച്ചടവ് മുടങ്ങി. ഇതോടെയാണ് ലോണ്‍ തിരിച്ചടവ് പ്രതിസന്ധിയിലായത്. 

സംഭവത്തില്‍ മന്ത്രി രാജീവ് കലക്ടറോട് വിശദീകരണം തേടിയിട്ടുണ്ട്. നിയമപരമായാണ് ജപ്തി നടപടികള്‍ സ്വീകരിച്ചെന്നാണ് ബാങ്ക് നല്‍കുന്ന വിശദീകരണം. ഒറ്റത്തവണ തീര്‍പ്പാക്കല്‍ സംസാരിച്ചെങ്കിലും പിന്നീട് തുക അടയ്ക്കാന്‍ വീട്ടുടമ തയ്യാറായില്ലെന്നും ബാങ്ക് അധികൃതര്‍ ആരോപിച്ചു. 

SBI takes confiscation action when there is no one in the house Family on highway in Kalamassery