ഗസ്സയില്‍ വീണ്ടും ഇസ്‌റാഈല്‍ കൂട്ടക്കൊല. വടക്കന്‍ ഗസ്സയിലെ ജബലിയയിലെ അഭയാര്‍ഥി ക്യാംപിന് നേരെയായിരുന്നു ആക്രമണം. 

ഗസ്സയിലെ നുസൈറാത്തില്‍ അഭയാര്‍ഥി ക്യാംപായി പ്രവര്‍ത്തിക്കുന്ന സ്‌കൂളിനുനേരെ  നടത്തിയ വ്യോമാക്രമണത്തില്‍ സ്ത്രീകളും കുട്ടികളുമടക്കം 17 പേരാണ് കൊല്ലപ്പെട്ടത്. കൊല്ലപ്പെട്ടവരില്‍ 11 മാസം പ്രായമായ കുഞ്ഞും ഉള്‍പെടുന്നു. 32 പേര്‍ക്ക് പരിക്കേറ്റിട്ടുണ്ട്. ഹമാസ് പോരാളികളുടെ ഒളിത്താവളമെന്ന് ആരോപിച്ചാണ് ഇസ്‌റാഈല്‍ നിരന്തരം അഭയാര്‍ഥി ക്യാംപുകള്‍ക്ക് നേരെ ആക്രമണം നടത്തുന്നത്. 

അതേസമയം, ലെബനാനില്‍ നടത്തിയ ആക്രമണത്തില്‍ മൂന്ന് മാധ്യമപ്രവര്‍ത്തകര്‍ കൊല്ലപ്പെട്ടു. തെക്കന്‍ ലബനാനിലെ ഹസ്ബിയ മേഖലയിലാണ് ആക്രമണമുണ്ടായത്. കഴിഞ്ഞ 24 മണിക്കൂറിനിടെ 19 പേരാണ് ലെബനാനില്‍ കൊല്ലപ്പെട്ടത്. ഇതുവരെയായി ലെബനാനില്‍ 2,593 പേര്‍ ഇസ്‌റാഈല്‍ ആക്രമണങ്ങളില്‍ കൊല്ലപ്പെട്ടിട്ടുണ്ട്. 

വടക്കന്‍ ഗസ്സയിലെ ഉപരോധവും ആക്രമണവും 20ാം ദിവസത്തിലേക്ക് കടക്കുമ്പോള്‍ 770 ഫലസ്തീനികള്‍ക്ക് ജീവന്‍ നഷ്ടപ്പെട്ടതായി ഗസ്സ മീഡിയ ഓഫിസ് അറിയിക്കുന്നു. ജബാലിയയിലും പരിസരത്തുമായി നടക്കുന്ന ആക്രമണത്തില്‍ 1000ഓളം പേര്‍ക്ക് പരിക്കേറ്റിട്ടുമുണ്ട്. ഗസ്സയിലെ ആകെ മരണം 42,847 ആയി. പരിക്കേറ്റവരുടെ എണ്ണം ഒരു ലക്ഷം കവിഞ്ഞു.