ന്യൂഡല്‍ഹി: ബീഫ് കഴിച്ചുവെന്നാരോപിച്ച് ഹരിയാനയില്‍ ഗോരക്ഷസേനാ ഗുണ്ടകള്‍ തല്ലിക്കൊന്ന പശ്ചിമബംഗാള്‍ സ്വദേശിയായ തൊഴിലാളിയുടെ വീട്ടില്‍നിന്ന് കണ്ടെടുത്തത് ബീഫല്ലെന്ന് സ്ഥിരീകരണം. ഹരിയാനയിലെ ഛര്‍ഖി ദാദ്രി ജില്ലയില്‍ പഴയസാധനങ്ങള്‍ പൊറുക്കി ഉപജീവനം നടത്തിവന്ന സാബിര്‍ മാലികിന്റെ വീട്ടില്‍നിന്ന് കണ്ടെടുത്ത മാംസത്തിന്റെ സാംപിള്‍ പരിശോധനാ ഫലമാണ് രണ്ട് മാസത്തിനുശേഷം പുറത്തുവന്നത്.

കണ്ടെടുത്തത് ബീഫല്ലെന്നും മറ്റൊരു മൃഗത്തിന്റെ മാസമാണെന്നും ലാബ് പരിശോധനയില്‍ വ്യക്തമായതായി പൊലിസ് അറിയിച്ചു.ഓഗസ്റ്റ് 27നാണ് 23കാരനായ സാബിര്‍ മാലിക് കൊല്ലപ്പെട്ടത്. ആക്രി സാധനങ്ങള്‍ വില്‍ക്കാമെന്ന് വിശ്വസിപ്പിച്ച് കടയിലേക്ക് വിളിച്ചുവരുത്തി സാബിറിനെയും സുഹൃത്ത് അസം സ്വദേശി അസിറുദ്ദീനെയും ഗോരക്ഷാ ഗുണ്ടകള്‍ മര്‍ദിക്കുകയായിരുന്നു.

കടയ്ക്ക് സമീപത്തുള്ളവര്‍ ഇടപെട്ടതോടെ പ്രതികള്‍ രണ്ടുപേരെയും മറ്റൊരുസ്ഥലത്തേക്ക് കൊണ്ടുപോയി മര്‍ദനം തുടര്‍ന്നു. സാബിറിന്റെ മൃതദേഹം പിന്നീട് കനാലിന് സമീപത്തുനിന്നാണ് കണ്ടെടുത്തത്. അസിറുദ്ദീന് സാരമായി പരുക്കേറ്റിരുന്നു. 
സംഭവത്തില്‍ പ്രായപൂര്‍ത്തിയെത്താത്ത രണ്ടുപേർ ഉള്‍പ്പെടെ അഞ്ചുപേരെയാണ് പൊലിസ് അറസ്റ്റ്‌ചെയ്തത്.