കൊച്ചി: ചലചിത്ര നിര്‍മാതാവ് സാന്ദ്രാ തോമസിനെ നിര്‍മാതാക്കളുടെ സംഘടനയായ പ്രൊഡ്യൂസേഴ്‌സ് അസോസിയേഷന്‍ പുറത്താക്കി. അച്ചടക്ക ലംഘനം ചൂണ്ടിക്കാട്ടിയാണ് പുറത്താക്കിയത്.

മലയാള സിനിമയിലെ നിര്‍മാതാക്കളുടെ സംഘടനക്കെതിരെ എസ്.ഐ.ടിക്ക് സാന്ദ്ര പരാതി നല്‍കിയിരുന്നു. സിനിമാവിതരണവുമായി ബന്ധപ്പെട്ട ഒരു യോഗത്തില്‍ വിളിച്ചുവരുത്തി അസോസിയേഷനിലെ ഭാരവാഹികള്‍ അപമാനിച്ചുവെന്ന പരാതിയില്‍ എറണാകുളം സെന്‍ട്രല്‍ പൊലിസ് കേസെടുത്തിരുന്നു. ഇതിന് പിന്നാലെയാണ് പുറത്താക്കല്‍.

അതേ സമയം, നിയപരമായി മുന്നോട്ട് പോവുമെന്ന നിലപാടില്‍ ഉറച്ചു നില്‍ക്കുകയാണ് സാന്ദ്ര. പരാതി നല്‍കിയതാണ് അച്ചടക്ക ലംഘനമായി പറയുന്നത്. പ്രൊഡ്യൂസേഴ്‌സ് അസോസിയേഷനിലും പവര്‍ ഗ്രൂപ്പുണ്ടെന്നും അവര്‍ പ്രതികരിച്ചു. 

നേരത്തെ, ഹേമ കമ്മിറ്റി റിപ്പോര്‍ട്ടിന് പിന്നാലെ പ്രൊഡ്യൂസേഴ്‌സ് അസോസിയേഷനെതിരെ ഗുരുതര ആരോപണങ്ങളുമായി സാന്ദ്രതോമസ് രംഗത്തെത്തിയിരുന്നു. പ്രൊഡ്യൂസേഴ്‌സ് അസോസിയേഷന്‍ പൊളിച്ച് പണിയണമെന്നും സിനിമ മേഖലയിലെ സ്ത്രീകളെ കളിയാക്കുന്ന സമീപനമാണ് അസോസിയേഷനുള്ളതെന്നും ഇത്തരം പ്രഹസനങ്ങളില്‍ നിന്ന് സംഘടന മാറിനില്‍ക്കണമെന്നും ആവശ്യപ്പെട്ട് സംഘടനക്ക് സാന്ദ്ര തോമസും ഷീല കുര്യനും കത്തുനല്‍കിയിരുന്നു.

ഹേമാ കമ്മിറ്റി റിപ്പോര്‍ട്ടിന്റെ സാഹചര്യത്തില്‍ സിനിമാ രംഗത്തെ വനിതാ നിര്‍മാതാക്കള്‍ കടന്നു പോകുന്ന പ്രശ്‌നങ്ങളെക്കുറിച്ചുള്ള ചര്‍ച്ചക്കായി സംഘടന ഒരു യോഗം വിളിച്ചിരുന്നു. ഇതിന് പിന്നാലെയായിരുന്നു സാന്ദ്രയുടെ പ്രതികരണം.

The Producers Association has expelled filmmaker Sandra Thomas, citing disciplinary violations. This decision follows Sandra's complaint to the police against the association's officials, alleging humiliation during a film distribution meeting