പാലക്കാട്: പാലക്കാട് നടന്ന പാതിരാ പരിശോധനയും കോണ്‍ഗ്രസ് നേതാക്കള്‍ക്ക് എതിരായ കള്ളപ്പണ ആരോപണങ്ങളിലും തെരഞ്ഞെടുപ്പ് കമ്മിഷന്‍ ജില്ലാ കലക്ടറോട് റിപ്പോര്‍ട്ട് തേടി. കോണ്‍ഗ്രസിന്റെ വനിത നേതാക്കളുടെ ഹോട്ടല്‍ മുറികളിലടക്കം നടന്ന പരിശോധനയെ കുറിച്ചും, എന്താണ് സംഭവിച്ചതെന്നതിനെ കുറിച്ചുമാണ് കലക്ടറോട് പ്രാഥമിക റിപ്പോര്‍ട്ട് തേടിയത്. 

ഉടന്‍ റിപ്പോര്‍ട്ട് നല്‍കണമെന്ന് മാത്രമുള്ള നിര്‍ദ്ദേശത്തില്‍ സമയപരിധി കൃത്യമായി പറഞ്ഞിട്ടില്ല. റിപ്പോര്‍ട്ട് ലഭിച്ചതിന് ശേഷമായിരിക്കും കമ്മിഷന്റെ തുടര്‍ നടപടി.

കോണ്‍ഗ്രസ് നേതാക്കള്‍ തങ്ങിയ ഹോട്ടല്‍ മുറിയില്‍ പൊലീസ് അര്‍ധരാത്രി പരിശോധന നടത്തിയ സംഭവത്തില്‍ പ്രതിപക്ഷ നേതാവ് വി.ഡി. സതീശന്‍ കേന്ദ്ര തെരഞ്ഞെടുപ്പ് കമ്മിഷന് പരാതി നല്‍കിയിരുന്നു.

ചൊവ്വാഴ്ച രാത്രി 11 മണിയോടെയാണ് കോണ്‍ഗ്രസ് നേതാക്കളുടെ മുറിയില്‍ പൊലീസ് പരിശോധ നടത്തിയത്. പരിശോധനയില്‍ ഒന്നും കണ്ടെത്താനായില്ലെങ്കിലും വലിയൊരു രാഷ്ട്രീയ വിവാദത്തിനാണ് അത് വഴിവെച്ചത്.